Bombero mopalit og gagmay'ng trak

CEBU, Philippines -  Ang pagpamalit og mga gagmay’ng firetruck maoy plano sa mga kadagkoan sa kabomberohan sa dakbayan sa Mandaue ning tuiga aron magamit sa pagsumpo sa mga sunog sa mga dapit nga gagmay og karsada.

Matud pa ni Mandaue City Fire Marshal F/CInsp. Rogelio Bongabong nga kasagarang hinungdan sa dakong sunog naggumikan sa kakuwang og mga agianan o kaha gagmay kaayo og karsada nga dili kaagian sa mga dagkong trak sa bombero ilabi na sa mga dapit sa mga eskuwater

 Sa pagsaulog sa Fire Prevention Month ning bulan sa Marso misaad si Bongabong nga iyang ipadangat ngadto sa ilang ulohang buhatan ang maong sugyot sa pagpamalit og mga gagmay’ng trak sa bombero.

Hinuon wala mopasalig si CInsp. Bongabong nga maangkon dayon ang maong mga kahimanan kay mag-agad kini sa budget sa nasudnong kagamhanan alang sa kabomberohan.

 Hinuon naglaum si Bongabong nga moabot karong tuiga ang gisaad sa kagamhanang lokal sa Mandaue nga mga bag-ong trak sa bombero nga ipagamit sa fire department sa dakbayan.

Subay niini si Bongabong mipahimangno sa mga residente sa dakbayan sa Mandaue nga dili mokompiyansa ning bulana kay bisan ting-uwan, ang daling masunog mao kadtong mga balay kansang kuryente kinawat gikan sa main line sa VECO nga wala moagi og kuwentador.

Kinahanglan usab nga magmabinantayon kanunay ang tanan ug mag-inabtik sa pagsumpo sa kayo nga moigo sa usa ka panimalay sa dili pa moabot ang bombero aron dili kini daling mokatap sa ubang kabalayan. (BANAT NEWS)