Patay nang nakit-an sa mga anak ang 75-anyos

CEBU, Philippines - Patay nang napalgan sa mga anak ang ilang 75-anyos nga amahan nga nagbitay sa pisi kagahapon sa buntag diha sa sitio Tunga, barangay Tanke, dakbayan sa Talisay.

Migamit sa tres metros nga nylon nga pisi si Marcelino Daan nga usa na ka biyudo. Si PO3 Mikie Espina, PO2 Stephen Sefuesca ug PO1 Rosauro Pasumala sa Talisay City Police Station nga nag-imbestigar sa hitabo nagkanayon nga niadtong Martes sa buntag si Daan ug ang anak niining lalaki nagkalalis kabahin sa personal nga hinungdan ug nianang pagkahapon sa mao gihapong adlaw ang anak nga babaye ni Daan mao na usab ang nakalalis niini.

Matud ni Espina sa Banat News nga nianang pagkagabii niadtong Martes wala na magtingogtingog ngadto sa iyang mga anak si Daan. Hinuon wala usab kini magpakita og motibo nga maghikog.

Sa imbestigasyon usab sa grupo ni PO3 Espina giingong si Daan hilabihan na kini ka luoran.

Kagahapon sa buntag nakugang na lang ang mga anak niini tungod kay si Daan nagbitay na diha sa sala sa ilang balay.

Ang liog duna nay higot nga pisi ug ang pikas tumoy sa pisi gihigot ngadto sa babag nga kahoy diha sa kisame.

Giingong si Daan mipatong og bangko aron makaabot og higot sa pikas tumoy sa pisi ngadto sa kahoy ug dayon hikot sa pikas tumoy sa iyang liog ug pagkahuman gipatiran niya ang bangko nga iyang gipatungan.

Si Daan gidala sa Talisay City District Hospital apan patay na kini nga naabot sa maong tambalanan. – BANAT NEWS