Si Sara ray nahibawo
Mao diay nga si Bise Presidente Sara Duterte ra ang nahibawo nga gihulga siya sa administrasyon ni Presidente Ferdinand Marcos Jr. sukad sa 2023. Kanus-a gitawag pa siya ni Marcos Jr. nga “BFF” ug nagsige pa si Sara og sulti nga, “I love you, BBM.”
Mao diay nga wala kahibawo ang kapin sa tulo ka gatos niya ka security escorts nga mga sundawo ug mga polis nga ang dugay nang hulga maoy nakapugos niya sa pagkontrata og tawo nga mopatay sa presidente, first lady ug House speaker kon dunay mahitabo niya.
* * *
Tungod diay tingali sa talagsaon nga abilidad ni Sara sa pagkakita og hulga nga nataligam-an sa mga sundawo ug mga polis nga gipaubos og makuti nga training sa pagpanalipod niya ug sa mga sakop sa iyang pamilya.
Ambot giunsa pagpadako si Sara sa iyang amahan nga si kanhi Presidente Rodrigo Duterte nga mas kamao man siya nga nisusi sa kinatibuk-an sa iyang palibot. Maong nakakita og seryuso nga hulga sa labing kasarangan nga mga talan-awon nga gipaka ingon sa iyang mga guwardiya nga walay daotang implikasyon batok niya.
* * *
Nabisto ang talento ni Sara sa pagpaniid sa nahitabo karong bag-o sa iyang kanhi katabang sa balay:
• Niadtong Lunes sa gabii, gisugo iyang tigpamaba nga si Atty. Paolo Panelo pagpahibawo sa publiko nga nakadawat siya og mensahe sa kanhi katabang nga nagpa-rescue; maongPagka Martes, gipahibawo ni Panelo ug tanang propagandista sa mga Duterte sa social media nga gitanggong ang kanhi katabang kay nagdumili pagpirma og affidavit batok ni Sara.
* * *
Pagka Huwebes, gipahibawo ni Panelo nga naluwas ang mga kanhi katabang (duha diay) sa mga abogado ni Sara. Nikurihir si Panelo nga wala tanggonga ang mga biktima sa ilang employer. Pero niinsistir nga nabadlong ang laing pagsuway sa administrasyon pagdaot ni Sara.
Duna hinuoy problema. Inilang abogado nga dumadapig ni Sara niingon nga iyang kliyente ang gipasanginlan nga nitanggong sa duha ka babayeng trabahante. Ang negosyante maoy nitambag nila pagpakitabang ni Sara human gisulod og kadudahang mga tawo ang iyang resort sa Boracay nga ilang gitrabahoan. Si Sara ray makapasabot nganong giisip nga hulga batok niya ang gidudahan nga hulga batok sa iyang mga kanhi katabang.
* * *
- Latest















