Mga campaign material ipalaksi

CEBU, Philippines - Si Congressman-elect Gabriel Luigi Quisumbing sa ika-unom nga distrito miawhag sa tanang mga kandidato sa milabay’ng eleksyon niadtong Mayo 10 nga mangunay sa pagpanglangkat sa gipapilit niining mga campaign poster.

Kini aron sila makatabang sa paghinlo sa mga koral ug bongbong sa mga establisamento nga gipahimuslan sa mga politiko sa pag-promote sa ilang ngalan.

Sumala pa ni Quisumbing nga sa iyang kaugalingon nanuhol siya og mga tawo sa pagtangtang sa kaugalingon niyang mga campaign material hinungdan nga wala na siyay dagway nga makita pa karon diha sa kadalanan.Apan gitataw niini nga kasagaran sa mga nahibiling mga campaign material mao kadtong iya sa mga pilderong kandidato kinsa wala na magtagad pagpanglaksi sa ilang mga poster human sa piniliay.

Matud pa ni Quisumbing nga tulubagon gayud sa mga kandidato nakadaog man o napildi ang paglaksi sa ilang mga poster sa lugar nga nahugawhugawan niini.

Nanghinaot siya nga ang iyang gihimo, sundon usab unta sa ubang mga kandidato aron nga dili maglagot ang katawhan nga magsud-ong sa ilang mga dagway nga nagpabilin lang gihapon hangtod karon.   (BANATNEWS)