Reservist kaabag sa komunidad

CEBU, Philippines - Ang mga Airforce Reservist gitakdang bansaybansayon dili lamang sa gubat kundi bisan sa pag-ayuda niadtong mabiktima sa kalamidad.

 Kini ang giluwatang pamahayag ni Col. Alfredo Cayco sa Philippine Air Force (PAF), ang Vice Commander sa Airforce Reserved Command (ARC) sa iyang pagbisita dinhi sa Sugbu kagahapon sa buntag.

Sa iyang pagpamulong isip pinasidunggang dinapit sa gradwasyon sa mga Reserved Officers Training Course Cadets and Caddetes sa Philipine State College of Aeronautics (PHILSCA) sa Mactan Benito Ebuen Air Base sa dakbayan sa Lapulapu, iyang gipasabot ang ka-importante sa gimbuhaton sa usa ka reservist kansang tahas gipunting  sa pag-atiman sa komunidad nga duawon sa mga katalagman.

 Miingon si Col. Cayco nga kaniadto ang mga tinun-an nga mikuha sa ROTC ug nahimong reservist gibansaybansay alang sa pagsumpo sa insurhensiya sa nasud, busa dyutay ray misulod sa pagkasundawo kay mahadlok sa gubat.

 Apan matud pa niya nga sa pagkakaron, ang ARC mihatag

 og mga kasangkapan alang sa ilang pagbansaybansay sa search and rescue operation sa panahon sa katalagman sa matag lugar nga apektado.

 Samtang si Dr. Nonadel Soriano ang Campus Director sa PHILSCA miawhag sa mga mikuha og ROTC nga kinahanglang tinud-on nila ang ilang pagbansay aron sayon ra silang makasulod sa pagkasundawo kun gusto nila. (BANATNEWS)