Naninda sa diskohan gipusil namatay

CEBU, Philippines – Patay nang nadangat sa tambalanan sa lungsod sa Sogod ang usa ka 26-anyos nga lalaki human kini gipusil sa duha ka mga lalaki alas 11:30 sa gabii niadtong Lunes sa sitio Tagaytay, barangay Pansoy.

Ang namatay giilang si Erik Dungalio Olaivar, 26,   nagpuyo sa nahisgutang lugar tungod sa mga samad pinusilan sa kalawasan human pusila sa duha ka wala mailhing lalaki. Sa report nila ni SPO2 Gualberto Arnado sa kapulisan sa Sogod nga giduso diha sa Operations Office sa Cebu Provincial Police Office, giingong gipusil makatulo kahigayon si Olaivar.

Giingong naninda ang biktima uban sa iyang asawa gawas sa diskohan atol sa kapistahan sa ilang dapit niadtong tungura apan miadto kini sa luyo ug kalit lang nadungog ang buto sa armas.

Gikatahong gigukod pa sa mga mamumuno si Olaivar hangtud naabtan ug gipusil.

Ang mga mamumuno nanagan sa luyong bahin sa simbahan paingon sa kakahuyan ug wala na maabti sa mirespondeng mga sakop sa Citizens Armed Forces and Geographical Unit ( CAFGU). - Guam Logroño (BANAT NEWS)