Hepe sa Lapu' police ilisan

CEBU, Philippines – Ang mayoriya sa mga sakop sa konseho sa dakbayan sa Lapulapu pabor sa tinguha ni Mayor Arturo Radaza paghulip kang Senior Superintendent Mariano Natuel isip hepe sa kapolisan sa maong dakbayan.

Usa ka resolusyon ang gipalabang sa regular session niadtong Martes nga gipangamahanan ni Konsehal Rodulfo Potot nga nag-awhag pagpahulip kang Natu-el.

Ang rason sa pagpahulip kang Natu-el mao ang giingong kawala niini koordinasyon sa iyang mga plano ug gipanghimo diha sa mayor sa dakbayan.

Usa sa giingong walay koordinasyon mao ang pagkuha niini og mga sakop sa Barangay Intelligence Network (BIN) tungod kay giingong sagad sa nahisakop niini dili mga lumolupyo sa dakbayan.

Ang BIN kaabag sa kapolisan sa pagpatuman sa kahapsay ug kalinaw sa dakbayan nga boluntaryong miserbisyo sa katawhan pinaagi sa paghatag og inpormasyon bahin sa mga kriminal.

Ang resolusyon nagkanayon nga bisan og may pagtugot sa Department of Interior and Local Government (DILG) nga makatukod og mga kahugpongan nga makatabang sa kampanya batok krimen ang kapolisan kinahanglan gihapon kining ipananghid sa local nga kagamhanan.                                                                                                                                                                                                                       

Sa nasayran nga nagpadala na og sulat si Radaza kang PRO-7 Director Federico Terte nga nag-awhag sa paghulip kang Natuel ug gipangayo niining maoy ibalik sa pagdistino ang kanhi hepe sa maong kuwerpo nga si Senior Superintendent Louie Oppus. – BANAT NEWS