Nagbisikleta napisak sa trak

Cebu - Namatay ang usa ka wala hiilhing lalaki human kini ligsi sa 10 wheeler truck samtang nagsakay sa iyang bisikleta sa New Road, Poblacion, lungsod sa Liloan niadtong miaging Sabado sa hapon. Ang drayber sa trak nga si Romeo Arese, 36, minyo nga taga barangay Jagobiao, dakbayan sa Mandaue nagkanayon nga gikan siya sa amihanang bahin sa lalawigan ug pag-abot sa New Road kalit milabang ang biktima sa karsada ug uwahi na siyang nakatamak sa preno hinungdan sa maayong pagkadumbol sa biktima ug nalatayan sa ligid. Si SPO2 Eduard Mollena nga nahinabi sa Banat News miingon nga wala pa mailhi ang biktima kansang lawas naa karon sa usa ka punerarya sa Liloan.  - Romeo Limpangog (BANAT NEWS)