Duha patay sa aksidente

Cebu - Duha ang patay ug upat ang nangaangol sa duha ka managlahing aksidente sa kadalanan niadtong milabay’ng adlaw’ng Domingo ug Lunes sa lalawigan sa Sugbu.

Sa lungsod sa Tabogon niadtong Domingo, usa ka Aldrin Christian ang namatay samtang naangol ang drayber sa habal-habal nga si Lito Booc dihang kalit nga mibuto ang ligid sa ilang gisakyan pag-abot sa sitio Bitoon sa barangay Muabog sa maong lungsod.

Matud ni PO3 Jesus Suan sa Tabogon Police dihang nahinabi sa Banat News gikan nitambong og family reunion ang mga biktima sa usa ka beach sa lungsod sa Borbon ug parehong gituuhang nakainom maong kusog sab nga nakapadagan.

Subay sa inisyal nga imbestigasyon sa kapulisan nabuthan sa ligid sa atubangan nga bahin ang maong motorsiklo ug tungod sa kakusog sa pagpadagan nalimbuwad kini og nalabay ang duha sa kakahoyan sa kilid sa kalsada.

Matud ni PO3 Suan patay diha-diha si Christian human mapusa ang ulo ug nawong ngadto sa punoan sa kahoy ug wala na madala pa sa tambalanan samtang si Booc nakaangkon og daghang mga pangos sa agtang ug kalawasan ug gidala sa Don Juan Dosado Hospital sa Sogod.

Laing aksidente nga mikalas og usa ug miangol og duha apil na ang usa ka 13-anyos nga estudyante dihang nagbangga ang usa ka traysikol ug motorsiklo sa barangay Bugas lungsod sa Badian niadtong Lunes sa alas 5:00 sa hapon.

Ang namatay mao ang drayber sa traysikol nga si Joel Macabenta, 36 ug ang mga naangol mao ang iyang 13-anyos nga pasahero nga si Jordan Duerme ug ang drayber sa motorsiklong gikabangga nga si Junnie Cuansing, 26, nga collector sa Norkis nga nagbase sa maong lungsod.

Matud ni PO3 Vincent Aguanta sa Badian Police dihang nahinabi sa Banat News padulong maghatud sa pasahero ang traysikol samtang gikan sa Moalboal usab ang kasugat nga motorsiklo niadtong tungura.

Gibutyag ni PO3 Aguanta nga pag-abot sa lugar nikawat sa pikas linya ang traysikol nga nag-ekis ekis ang dagan hinungdan nga nagkabangga gyud kini sa gikasugat niining motorsiklo.

Ang motorsiklo nalabay human nibalitok upat ka higayon samtang nagusbat gyud ang traysikol hinungdan nga pulos gidala ang drayber ug pasahero nga bata sa Badian District Hospital apan paglabay sa 30 minutos namatay si Macabenta.

Matud ni PO3 Aguanta ang bata mitug-ang nanimaho og bino ug daw hubog ang drayber sa traysikol niadtong tungura. – BANAT NEWS