Ang Pista sa Sto. Kristo de Limpia

CEBU - Ang tinuig nga paghandom sa kapistahan sa Sto. Kristo de Limpia diha sa Basilica del Sto. Niño magsugod sa Sept. 9 ngadto sa 11, 2008. 

Ipahigayon ang ritwal nga “Triduo” inubanan sa novena ug sundan kini pagselebrar sa Balaanong Misa sa adlaw'ng Huwebes Sept. 11, ang adlaw sa kapistahan, nga maoy magsilbeng culmination day sa tulo ka adlaw'ng relihiyosong kalihukan.

Ang Santos nga Misa i-selebrar ni Rev. Fr. Rodolfo Bugna, OSA, rector nga duyugan sa nabantog na kaayong UV Chorale.

Ang debosyon ngadto sa Sto. Kristo de Limpia nagsugod niadtong 1900s diha sa Basilica dihang ang imahe ni Hesukristo diha sa krus gidonar ngadto sa Augustinian fathers sa magtiayong Don Juan Rivera ug Doña Andrea Rivera, mga ginikanan sa nitaliwang si Inday Pining Gullas.

Ang maong imahe gililok sa Espanya, ug sukad sa pag-abot niini diha sa maong simbahan sa mga nilabay'ng katuigan daghan nang mga mirakulong nahitabo nga gitumbok nga gumikan sa debosyon. - BANAT