Giduwaang armas mibuto, 18 anyos igo

Nalandig sa Cebu City Medical Center (CCMC) ang usa ka 18 anyos nga lalake human maigo sa bala gikan sa  pistolang giduwaan sa iyang higala diha sa St. Jude, barangay Hipodromo, ning dakbayan kagahapon sa alas 4:00 sa kadlawon.

Ang samaran sa iyang tiyan mao si Rex Rondena, hingkod, taga St. Jude  samtang ang suspetsado  mao ang iyang silingan nga si Bevjen Torno, 22, anyos.

Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office nasayran nga ang biktima ug ang suspetsado uban sa ilang mga higala,  nag-inom daplin sa dalan sa may Primier St. sa nahisgutang lugar.

Human sa ilang inom, nagkasabot sila nga mangatulog sa balay sa ilang higala nga si Macky Genogen, diin si Torno nagduwa-duwa  sa .22 mga pistola.

Apan gumikan kay dili pa hanite mogunit og armas, nahagbong ang maong pusil ug sa pagbuto niini didto motaroy ang bala sa tiyan sa biktima.

Ang suspetsado boluntaryo nga misurender sa mga kapolisan, diin tulo ka mga buhing bala ug usa ka kabhang sa .22  kalibre nga armas ang napunitan sa mga otoridad gikan sa dapit nga nahitaboan.