Hapon nipatay sa humagbos

Miabot niadtong Martes sa hapon ang usa ka polis gikan sa Pampanga kinsa mikompirma sa taho nga ang   Japanese national nga si Shoji Uemura nga dunay kasong pagpatay didto sa Pampanga ang naghikog.

Base sa gihatag nga kopya sa mga dokumento ngadto sa kapolisan dakbayan sa Talisay gikan sa polis sa Pampanga ang insidente sa pagpatay nahitabo niadtong alas 2:10 sa hapon, Pebrero 4, 2008 sulod sa Masagna Videoke Bar sa dalan Masagna, Barangay Sindalan, dakbayan sa San Fernando, Pampanga.

Ang giingong biktima ni  Uemura mao si Fherrcienand Dasig Roy, 22-anyos  step-son sa Hapon.

Si Roy ang daling gidala sa Mother Teresa of Calcutta Medical Center apan gideklara kini ni Dr. Dax Tiduya nga namatay mga alas 3:05 sa hapon sa maong adlaw nga nahitabo ang insidente.

Base sa imbestigasyon nila ni Police Inspector Amado Bais ug PO3 Larry Aquilar sa Community Police Assistance Center-3 sa Pampanga nga si Uemura ang kalit lang nga mitungha sa giabangang apartment ni Roy ug sa walay igong rason nasuko ang maong Hapon ngadto sa biktima.

Si Uemura ang mihapak sa ulo ni Roy sa dala niining kalibre .25 nga pistola ug sa kahadlok sa biktima midagan kini paingon sa duol nga videoke bar apan gigukod kini sa Hapon.

Sa pagdagan ni Roy nadagma kini ug mihagsa sa karsada hinungdan nga naabtan sa suspetsado dayon gibunlot ang ulo sa batan-on ug gipusil kini sa ulo.

Human sa maong hitabo si Uemura ang daling misakay sa iyang Mitsubishi Pajero nga kolor abuhon nga nagtangag sa plakang TJP-255 ug mipahilayo sa lugar.

Nakuha sa mga polis gikan sa lugar nga nahitaboan ang usa ka kabhang sa bala sa kalibre .25 nga pistola.

Ang kapolisan mipadala og kopya sa impormasyon ngadto sa Bureau of Immigration and Deportation kabahin sa maong hitabo aron dili makabiya dinhi sa nasud ang Hapon tungod kay nagtago-tago kini human sa insidente.

Niadtong Pebrero 5, 2008 giduso ang kasong murder batok kang Uemura didto sa prosecutor’s office sa San Fernando,  Pampanga.