Murder ni Dokdok dili pa mahuman sa piskal

Dili makapasalig ang handling prosecutor sa Cebu City Prosecutors Office pagresolbar sa preliminary investigation sa kasong pagpusil patay kang kanhi Sta Fe Mayor Rogelio “Dokdok” Ilustrisimo Sr. sa dili pa matapos karong bulana.

Mao kini giluwatang pamahayag ni Fiscal  Marla Barcenilla ang handling prosecutor sa kaso ni kanhi SPO1 Arnulfo Pigon nga maoy gitumbok nga mipusil patay kang Ilustrisimo diha sa gawas nga bahin sa Provincial Comelec Office niadtong Mayo 2.

Si Pigon maoy gitumbok nga “trigger man” samtang si kanhi mayoralty candidate Domingo Zaspa ang gitumbok nga mastermind sa krimen.

Mao kini reaksiyon ni Fiscal Barcenilla human gipahibalo ni Tessie dela Calsada, staff ni Cebu City Prosecutor Nicholas Sellon nga maoy gisugo pag-follow up kang Justice Secretary Raul Gonzales kabahin sa mosyon sa kampo ni Pigon nga ipabalhin sa kaulohan ang pagpahigayon sa preliminary investigation sa kaso.

Matud ni dela Calzada nga gimando ni   Gonzales atol sa ilang paghinabi nga dalion ang pagresolbar sa kaso sulod sa usa ka bulan human gipresentar niya ang report gikan sa Cebu City Prosecutors Office nga pending for resolution ang maong kaso.

Nasayran nga motulo ka bulan na karong Agosto ang maong kaso nga anaa gihapon sa preliminary investigation human kini napasaka sa piskaliya niadtong ikaduhang semana sa Mayo.

Hinuon una nang miluwat og pamahayag ang kampo ni Pigon ingon man ang kampo ni Zaspa nga hugtanong mihimakak sa kalambigitan sa krimen.