Reklamo sa mayor vs. Gwen gikwestyon

Gikwestiyon ni Gobernador Gwendolyn Garcia ang tayming sa pasangil ni Bise Mayor Ricky Ramirez sa Medellin nga anomaloso ang asphalting project nga gipatuman sa Kapitolyo.

Matud pa ni Garcia nga hapit magtulo ka tuig niyang gipatuman ang maong proyekto sa nagkalainlaing barangay sa lalawigan sa Sugbu apan karon lang nikwestiyon si Ramirez.

Si Ramirez nidangop sa buhatan sa Ombudsman aron ipaimbestigar ang maong transaksiyon nunot sa iyang pasangil nga unom lang sa 19 ka barangay sa ilang lungsod ang gipaboran sa gobernador.

Apan gipasabot ni Garcia nga sukad pa sa panahon sa iyang amahan nga si kanhi Gob. Pablo Garcia nga nanghatag siya og mga hinabang pinansiyal sa kabarangayan nga mangayo sa iyang buhatan.

Gani malipay siya kon ang mangayo nga barangay gikan sa ikaupat nga distrito nga balwarte sa iyang kaatbang nga banay’ng Martinez sanglit kadaghanan sa mga barangay did-an sa pagpangayo og proyekto sa Kapitolyo.

Si provincial treasurer, Atty. Roy Salubre, niklaro usab nga dili siya mopagawas sa pondo kon walay resolusyon ug program of works gikan sa barangay.

Matud pa ni Salubre nga ang pundo moderetso kini sa panudlanan sa barangay ug dili na mahimong gamiton pa sa laing katuyuan.

Si Garcia nipasumbingay nga ang pondo nga gikan sa Kapitolyo dili mahisama sa P28-milyones nga pondo gikan sa Kongreso alang sa Girl Scouts of the Philippines apan nasulod sa pribadong account sa bangko.