Sunodsunod nga tulis gika-alarma

Na-alarma na ang mga opisyal sa siyudad sa Sugbo niining sunodsunod nga mga pagpanulis sa dakbayan niining nangaging mga adlaw apil na niini ang tulis sa Anchor Savings Bank sa may dalan Archbishop Reyes kagahapong adlawa.

Si Bise Mayor Michael Rama, tsirman sa Police Coordinating and Advisory Council (PCAC) gitakdang makigtagbo ngadto kang Police Regional Office (PRO-7) Director Silverio Alarcio Jr. aron awhagon kini pagtabang pagpangita og paagi nga masumpo ang mga mitumaw nga pagpanulis dinhi sa dakbayan.

Gipadayag ni Rama nga dili angayang basulon ang hepe sa Cebu City Police Office nga si Sr. Supt. Patrocinio Comendador gumikan kay gawas nga bag-o pa lang kini sa katungdanan hulip ni kanhi CCPO chief Supt. Melvin Gayotin nagkagamay usab karon ang kapolisan dinhi sa dakbayan.

Tumong sa bise mayor sa iyang pagpakigtagbo kang Alarcio aron madugangan og mga polis nga idistino dinhi sa dakbayan aron mopalig-on sa police visibility.

Sa nahipos nga impormasiyon sa bise mayor ang tulis sa Anchor Savings Bank kagahapon mao nay ikalima nga sunodsunod nga dagkong tulis nga nahitabo dinhi sa dakbayan karong tuiga ug apil na niini ang tulis sa ticketing office sa Asian Spirit ug ang tulis sa Dranix Distributors Inc. sa Basak San Nicolas sa milabay'ng semana.

Wala hatagi og importansiya sa bise mayor ang mga tabi-tabi nga posibleng may kalambigitan sa nagsingabot nga eleksiyon karong Mayo ang maong mga pagpanulis tungod kay ang importante alang niya nga masumpo ug masikop ang mga suspek sa labing daling panahon.

Nunot niini, gitinguha usab ni Rama nga tapukon ang tanang mga anti-crime group, lain-laing security agency ug ang mga tanod sa kabarangayan aron magkahiusa pagsumpo sa mga pagpanulis.