Bomba sa BMW, mga nuog diay

Gikatahong bomba nga gibutang sa bag-ong BMW sa Uniwide building duol sa Cebu International Convention Center sa dakbayan sa Mandaue gialarma sa kapolisan atol sa dry run sa Asean Summit kagahapon sa buntag.

Ang mga sakop sa Special and Weapon and Tactic (SWAT) sa Mandaue City Police Office (MCPO) dali nga mitubag sa maong alarma uban sa SWAT sa Cebu City Police Office.

Ang maong bomba nga gikataho nga gisulod og bag apan dihang gisusi sa mga sakop sa SWAT maoy ilang nasuta nga mga trapo ug biya nga mga sapot sa bata ang sulod niini.

Si Sr. Supt. Alexander Abadinas nga gikahinabi sa Banat News miingon nga mga nuog nga trapo ug mga biya nga sinena sa bata ang sulod sa maong bag.

Matud pa niya nga ang maong alarma nadawat sa kapolisan sa MCPO sa iyang paghidangat kagahapon sa buntag alang sa iyang pag-asumer isip hulip sa city director nga si Sr. Supt. Eduardo Catabas.

Dugang pa niya nga kabahin sa dry run ang maong alarma sa pagsulay sa katakus sa kapolisan sa pagtubag sa maong alarma sa panahon sa Asean Summit.

Si PO2 Larry Gonsalez sa SWAT sa MCPO miingon nga sa pagpunit pa lang daan sa bag mailhan na ang gibug-aton sanglit gaan man ang gisulod nga panapton.