Tomas suporta sa laraw paghimo ug auxiliary cops sa mga tanod

Suportado ni Mayor Tomas Osmeña ang laraw nga paghimong auxiliary cops sa mga tanod sa kabarangayan dinhi sa dakbayan sa Sugbo aron makatabang sa kampanya sa kapolisan pagsumpo sa kriminalidad.

Gibutyag ni Osmeña atol sa press conference kagahapon nga iya ang orihinal nga konsepto ning tinguha karon nga paghimong auxiliary cops sa mga tanod.

Giangkon sa mayor nga kun wala pa ang ayuda sa mga tanod sa kabarangayan mas mosamot pa unta ang nasinati karong mga kriminalidad dinhi sa dakbayan.

Gitug-an sa mayor nga siya maoy nagpalig-on sa organisasyon sa mga tanod sa kabarangayan aron makig-alayon kini sa kapolisan hinungdan nga namugna ang programang Oplan Pakigsandurot.

Giklaro sa mayor nga pabor usab siya sa laraw nga isyohan og armas ang mga tanod nga ma-deputize isip auxiliary cop ug gani mipadayag kini og kaandam nga mogahin og pundo ang siyudad alang sa pagpalit og mga armas nga ikargada unya sa mga tanod.