DBM niaproba sa 5,711 ka regular nga posisyon

CEBU, Philippines — Giaprobahan sa Department of Budget and Management (DBM) ang 5,711 ka regular nga posisyon ug kapin sa 21,000 ka contractual nga posisyon alang sa Department of Social Welfare and Development (DSWD).

Tumong niini nga mapalig-on ang workforce nga nagpatuman sa mga social protection program sa gobiyerno.

Kadaghanan sa regular nga posisyon alang sa Pantawid Pamilyang Pilipino Program (4Ps) diin 5,703 ka posisyon ang giaprobahan aron mapalig-on ug ma-institutionalize ang operasyon niini sa tibuok nasud.

Matud ni DBM Acting Secretary Kim Robert De Leon nga dili lang pundo ang gikinahanglan sa social protection programs apan usa usab ka igo, stable ug propesiyonal nga workforce nga direktang nagserbisyo sa mga Pilipino.

Apil sa giaprobahan ang pag-institutionalize sa 4Ps Bureau sa DSWD Central Office, walo ka organizational units ubos niini ug usa ka 4Ps division sa matag 17 ka DSWD regional offices.

Gikataho nga sa 5,703 ka regular nga posisyon, 5,542 niini ang alang sa 4Ps divisions sa mga rehiyon.

Dugang pa, 85 ka regular nga posisyon ang motabang sa regional operations sama sa finance, administration, logistics, information and communications technology ug general support.

Giaprobahan usab ang 64 ka posisyon alang sa 4Ps bureau sa central office ug 12 ka posisyon alang sa ubang serbisyo sa DSWD.

Ang 5,703 ka regular nga posisyon gitumong usab aron mahatagan og oportunidad ang mga kwalipikadong contractual personnel nga dugay na’ng nagtrabaho sa mga buluhaton nga adunay kalabotan sa 4Ps ubos sa mga lagda sa Civil Service.

Gawas sa regular nga mga posisyon, nakaumol usab ang DBM og 20,686 ka contractual positions alang sa mga kwalipikadong COS/JO workers sa 4Ps gikan 2014 hangtud sa 2025 diin 314 ka kwalipikadong COS/JO workers ang una na’ng na-convert ngadto sa contractual positions.

Niadtong Hunyo 2026, giaprobahan usab sa DBM ang contractual positions alang sa ubang DSWD programs lakip ang 75 alang sa Supplementary Feeding Program, 160 alang sa KALAHI-CIDSS ug 70 alang sa Pag-Abot Program.

Adunay 43 usab ka contractual positions nga naunang giaproba alang sa Enhanced Partnership Against Hunger and Poverty (EPAHP) Program.

Matud sa DBM nga ang maong lakang kabahin sa pagpalig-on sa 4Ps ubos sa Republic Act No. 11310 nga nagtudlo sa DSWD isip nag-unang ahensiya sa pagplano, pag-coordinate, pagpatuman ug pag-monitor sa programa.

Ug pinaagi sa mas lig-on nga workforce gilaoman nga mapalambo ang program planning, field monitoring, case management, grievance resolution ug suporta sa mga benepisyaryo. — /BDB (BANAT NEWS)