Napu ka polis ipalabay-Gayotin

Nagplano karon si Cebu City Police Office acting director Melvin Gayotin sa pagpalagpot gawas sa CCPO sa napulo ka mga polis nga iyang gihulagway nga mga badlungon gumikan sa daghang mga reklamong nadawat batok kanila.

Si Gayotin sa pakighinabi sa Banat News mibutyag nga ang maong mga polis gireklamo diha kaniya pinaagi sa text messages ug daan na siyang nakadungog og reklamo gikan mismo sa ilang mga hepe kabahin sa ilang pagkabadlungon.

Hinuon wala ilha ni Gayotin ang maong mga polis apan gibutyag niining ang uban kanila dugay nga nadestino sa kasamtangan nilang pwesto karon. Gituuhan karon ni Gayotin nga kini maoy hinungdan nga naanad nalang kining maong mga polis bisan nakahibalo silang sayop ang ilang gihimo.

Ang maong mga polis wala hinuoy bug-at nga mga salaod nga nahimo apan nahimo silang dili epektibo sa ilang pagkapolis dinhi sa dakbayan ug gikinahanglan nga ibalhin na sila og destino.

Ang kadaghanang reklamo mao ang pagka-palaabsent diha sa ilang buhatan, mangareglo og mga kaso, ug abusado sumala pang Gayotin.

Usa sa dakong rason ni Gayotin mao nga dili niya buot nga mosangpot sa higayon nga makasala na ang maong mga polis ug madaut na hinuon sila sa ilang trabaho ug magduhig sa pangalan sa kapolisan.

Sa pagkakaron nga gikinahanglan pa ang dugang tawo alang sa umaabot nga ASEAN Summit matud pang Gayotin igo lang siya maka-rekomendar una.