Lolo naligsan patay

Patay diha-diha ang 74 anyos nga lalaki dihang naligsan kini sa naghaguros nga minibus gahapon sa kaadlawon diha sa Linao, Talisay City samtang ang biktima milabang aron pagpalit og ipamahaw.

Ang naligsan patay mao si Pascual Rondillos, 74, nagbuy-od pa dihang naabtan sa Talisay police diha sa Highway Linao, Talisay City.

Matud sa mga saksi nga mitabok sa pikas nga bahin sa karsada ang biktima aron mopalit og sud-an ug sa iyang pagbalik og labang, nadasmagan kini sa minibus nga magbiyahian og Carcar.

Matud ni Joel Baguio, usa sa mga saksi, nga kusog kaayong nagdagan ang minibus ug gani sa kakusog sa iyang dagan, ang usa ka tsinelas sa biktima wala na igkita sa dalan.

Sa kahadlok sa drayber nga si Allan Lapiz, wala dayon kini mohunong ug didto mitahan sa Talisay City Traffic Group.

Matud ni Lapiz nga mi-overtake siya og laing sakyanan ug wala na niya mabantayi ang biktima nga naa na sa tunga sa karsada.

Nangayo si Lapiz og pasaylo sa mga tagtungod sa biktima, apan bisan pa niini ang Talisay police mitakdang mosang-at og kasong reckless imprudence resulting to homicide.

Ang operator sa minibus nga si Ramces Lapis mipasalig hinuon nga andam nila abagahon ang tanan galastohon sa namatay nga biktima.