Megadome gitinguhang tukoron sa Talisay City

Ang mga Talisaynon nagkanayon nga kun may Cebu International Convention Center ang Mandaue City, may ikasarang usab niini ang Talisay City.

Matud pa ni Konsehal Rodi Cabigas naglaraw na sila karon sa pagtukod og usa ka "World class" nga megadome.

Gani sa pagkakaron upat na ka lugar sa dakbayan sa Talisay ang gitun-an sa mga kadagkoan sa kagamhanan aron maoy tarokan sa usa ka higanteng edipisyo nga iduyog sa nagtuybo karong lakaw sa modernong panahon.

Gipasabot ni Cabigas nga kining ilang nalantawan karon nga luna nga maayo kaayong tarokan sa megadome mao ang yuta sa pamilyang Mata diha sa barangay Biasong.

Ingon man ang yuta nga gipanag-iya sa Shell company diha sa barangay Dumlog, yuta nga gipanag-iya sa University of the Philippines diha sa barangay Lawaan I, ug ang laing pribadong luna sa sitio Uldog, barangay Poblacion, Talisay.

Si Cabigas maoy tsirman sa komitiba sa "sports" diha sa konseho sa Talisay ug usa sa labing karaang konsehal sa Talisay sukad pa sa lungsod pa kini.

Hinuon alang kaniya ang labi gyung maayong puwesto ning upat ka mga lugar, mao kining yuta sa UP diha sa Lawaan II, kay duol ug pabor kaayo sa Cebu South Coastal road.

Matud pa ni Cabigas nga kon kining yutaa sa UP maoy mapilian, himoon dayon nila ang pagpakigsabotsabot tali sa administrador sa maong eskuylahan.

Dugay na kaayong wa magamit alang sa maayong proyekto ang maong yuta ilabi na ang bahin sa edukasyon sa ngalang iya kining sa unibersidad nga gipadagan ra usab sa gobyerno.

Sa pagkakaron ang maong yuta gibahinbahin sa mga eskuwater ug gihimo nilang temporaryong pinuy-anan.