Mayor sa Boljoon nangunay'g dakop

Gipangunayan ni Boljoon Mayor Deogenes Derama ang pagdakop sa suspek sa pagkawat sa 30 ka kilos nga bronse nga alambre sa beach resort nga gipanag-iya sa ilang pamilya.

Alas 10 pasado na sa gabii niadtong Huwebes nga gisusi ni Derama kuyog sa mga polis ug mga civilian volunteers ang nahimutangan sa lima ka mga kawatan sa sityo Baladlan, Barangay Arbor, Boljoon.

Didto nasikop ang usa ka George Maravillas, 27 anyos, minyo, nga taga barangay Veto, lungsod sa Minglanilla.

Samtang nakaeskapo si Dado Caoyon, 18 anyos, kauban sa duha ka minor de edad nga pulos taga Veto, Minglanilla ug usa ka minor de edad nga taga Poblacion, lungsod sa Argao.

Nabawi ni Derama ug sa kapolisan ang usa ka bugkos nga alambre nga bronse nga moabot og 30 ka kilos.

Ang mga bronse nga alambre gikan sa The Club Fort Med Beach Resort sa Eli Boulevard, Poblacion, lungsod sa Boljoon nga gipanag-iya sa mga kabanay sa mayor.

Kasong pagpangawat ang gipasaka na sa kapolisan ngadto sa korte batok sa mga suspek. - Gregg M. Rubio