Kapitan, amahan gireklamo sa British national

British national ug ang asawa niining Filipina mireklamo ngadto sa buhatan sa kapolisan sa Talisay kagahapon sa buntag batok ni Dumlog barangay kapitan Charles Basillote ug sa amahan niining si Dennis Basillote kanhi konsehal sa Talisay.

Si Michael Reid, 50-anyos, Briton ug ang asawa niining si Saturnina Alonzo, 25, mipasangil sa amahan ug anak nga mi-harass kanila diin ang jalousey blade sa ilang bintana gibuak ni Charles.

Ang duha nagpuyo karon diha sa paabangan nga balay sa pamilyang Basillote sa barangay Dumlog diin ang negosyo niini imnanan ug videoke.

Matud pa ni Reid nga gusto pa unta siyang dapatan ni Charles apan miabot na ang mga polis.

Ang magtiayong Reid nagkanayon nga nagsugod ang ilang kagubot dihang wala sila mosugot sa sugyot ni Dennis nga patindahon sila og softdrinks ug pagkaon.

Kagahapon sa buntag unang naglalis si Dennis ug si Michael diin si Charles isip barangay kapitan misusi sa maong lalis para iya kining mahusay.

Matud pa ni Charles nga nainsulto siya dihang dili siya gustong pasudlon ni Michael sa gipuy-an niini.

Si Charles mipasangil nga ang nahitabong gubot nagsugod dihang gusto na nilang kuhaon ang ilang gipahulman nga bangko ug lamesa sa magtiayong Reid nga gigamit sa imnanan niini.

Matud pa sa mga polis nga nadala sa ilang gibating kasuko si Charles ug Dennis.

Gidala sa maong mga polis ngadto sa ilang buhatan ang managtiayong Reid para mahunong ang gubot.

Si Michael "giatake" sa iyang sakit nga "patol" diha sa buhatan sa mga polis tungod sa sobrang kasuko nga gibati niini apan naulian usab kini dayon.