Meralco, San Miguel unahang pumuwesto sa quarterfinals
MANILA, Philippines – Magpipilit makabangon ang Tropang Texters buhat sa kauna-unahan nilang kabiguan, habang mag-uunahan naman sa pagdakma sa ikaapat na tiket sa quarterfinals ang Beermen at Bolts.
Lalabanan ng TNT Katropa ang mainit na Globalport ngayong alas-4:15 ng hapon bago ang salpukan ng nagdedepensang San Miguel at Meralco sa alas-7 ng gabi sa 2016 PBA Governor’s Cup sa Smart Araneta Coliseum.
Nakalasap ang Tropang Texters ng 104-107 pagkatalo sa Mahindra Enforcers noong nakaraang Biyernes na nagmantsa sa dating malinis nilang record.
Mula naman sa 0-4 panimula, tatlong sunod na panalo ang ipinoste ng Batang Pier laban sa Bolts, Beermen at Rain or Shine Elasto Painters para manatili sa kontensyon sa quarterfinals berth.
Bagama’t nakatikim ng kabiguan, nanatili pa rin ang TNT Katropa sa solong liderato sa kanilang 6-1 kartada.
Ang mga koponang uupo sa No. 1 hanggang No. 4 ay hahawak ng ‘twice-to-beat’ advantage sa quarterfinals.
Ipaparada naman ng Beermen, umiskor ng 106-103 panalo laban sa Alaska Aces, si PBA veteran Mike Singletary bilang kapalit ng may injury na si Arizona Reid sa kanilang pagharap sa Bolts.
Naglaro si Singletary sa PBA para sa Barako Bull team at naging isa sa pitong imports na kinuha ng Mighty Sports para pagharian ang nakaraang Jones Cup sa Taipei.
Samantala, inaasahan namang gagamitin ng Rain or Shine ang bagong import nilang si Greg Smith sa pagsagupa sa Mahindra sa Biyernes.
- Latest