Kabit

Gula 75

"Nanghalok man ka'g kalit, Sir?" ni Erica pa nga wala makauyon sa gibuhat sa lalaki.

"Sor..sorry..wala lang ko makapugong sa akong gibati," Pagpangayo pagdespensa sa lalaki.

"Aw, hinuon sab dili unta angay ikahibulong nga kamong mga lalaki mopakita'g ubos nga pagtan-aw namong klaseha sa pagkababaye nga nia magtrabaho sa club. Sa inyong huna-huna diri namo okay lang kun unsay inyong gustong buhaton diri namo," matud pa sa babaye.

"Sorry gyud kaayo Erica ambot kun motuo ka ba nako una ko pa lang pagkakita  nimo naa na koy pagtan-aw nimo," matud pa sa lalaki mipahiyom og hilaw si Erica.

"Dili bag-o nako ang maong mga pulong sir Andy  dili na maihap ang mga lalaki nga miingon nako niana," matud pa ni Erica.

"Tinuod lagi sukad niadtong kaadlawon nga una tang nagkita nagsige na ko'g hunahuna. Gani gibalik-balikan ko ang lugar diin ta nagkita sa pamasin nga igkita tika pagbalik pero permi kong mapakyas. Apan sa dihang usa ka gabii niana naglakaw ko diha sa gawas nakita ko ang imong hulagway nakabutang didto Big Night Erica ang Misteryosa. Nakuratan ko wala ko magtuo nga nia ka diay dinhi magtrabaho," matud pa sa lalaki. "So dinhi ka diay niadtong big night sa club?" pangutana pa ni Erica. "Yes, Erica dinhi ko wala ko palabya ang higayon nga makita tika pagbalik gusto gani unta kong makig-table nimo pero, matud pa sa waiter duna na kunoy naka-una nga gustong makig-table nimo. Dinhi niining lamesaha ko naglingkod table number 6. Samtang nalingaw sa pagpakig-estorya nimo kadtong tiguwang nga lalaki, I think it was Mr. Chu ang nakig-table nimo adtong gabhiona usa ka inilang negosyante dinhi sa Cebu. Igo na lang kong nagsige'g tan-aw ninyo. Gihagad pa gani ko sa usa ka waiter kun gusto ba kong makig-table og babaye pero akong gibalibaran. Okay na ko nga makita ka uban sa laing customer," taas nga pulong sa lalaki.

"Nakaila ka kang Mr. Chu?" pangutana ni Erica sa lalaki "Oo, kaila kaayo," tubag sa lalaki.

"Hinuon sab sa imong barog ug hitsura  nakaila ka gyud niya kay sama kang Mr. Chu, adunahan ka," matud pa sa dalaga mipahiyom ang lalaki.

"Dili ko adunahan tingali  ang akong mga ginikanan maoy adunahan ug dili ako," matud pa sa lalaki. Mipadayon sa pag-ingon si Andy, "di ta maghisgot nila  ang atong hisgotan ang bahin natong duha." "Bahin natong duha? Kay unsa man diay ang bahin natong duha?" pangutana sa babaye.

"Bahin natong duha  gusto ko nga dili ni mao ang kataposan natong panagkita Erica  gusto ko nga masuod nimo. Gusto gani ko nga mas labaw pa sa suod," matud pa sa lalaki apan gikataw-an kini ni Erica nahibulong ang lalaki. "Nganong mikatawa ka man Erica? May kataw-anan ba sa akong gisulti nimo?"

"Nahimuot lang ko  wala gyud kay kalainan sa uban sir Andy ang uban pa moingon nga gusto sila nga ila kong i-abang og apartment,  hatagan sa tanang gikinahanglan, aduna pay uban  gustong paundangon ko sa pagtrabaho ug mo-   focus na lang ko nila mohatag og kuwarta doble sa akong kitaon dinhi sa club.

Sa laktod gusto nila nga himuon kong kabit. Apan walay bisan usang akong gidawat ang offer nia na ko ining matanga sa trabaho. Hugaw na ko sa mga mata ninyo pero dili ko mahimong pun-an pa ang hugaw sa akong pagkatawo pinaagi sa pagpakigpuyo sa tawong minyo. Hugaw ko kay nia ko ining maong dapit  apan adunay limpiyo nga intensiyon ug may limpiyong plano para sa akong kaugmaon ug kaugmaon sa akong pamilya. 

Nabuhi ko sa tip gikan sa customers nga akong gika-table, nabuhi ko sa commission sa lady's drink  ug nabuhi sa sweldo sa matag gabii kong pagsayaw. Apan dili ko puwede nga buhion ko ang akong kaugalingon ug ang akong pamilya pinaagi sa pagbaligya ko sa akong pagkababaye sa nagkadaiyang lalaki. Kontento nako kun unsay madawat kong sweldo isip dancer sa club. Wala makatingog si Andy  mitutok kini sa babaye ug mikupot sa kamot niini.

"Unsa may buot ipasabot ining pagkupot mo sa akong kamot sir Andy? Mo-offer ka sab nga himuon ko nimong kabit?" seryosong pulong sa babaye. (Sumpayan)