Itupo sa lain

Dear Tito Miguel,

Maayong adlaw ,ako diay si Jerick V,  usa ka gay, 21 years old ug taga Tisa, Cebu City. Naa ko'y boyfriend , siya si Cedrick ,20 anyos ug taga Guadalupe, Cebu City. Love kaayo nako akong uyab ,gani duha ka tuig na ang among relasyon,ug nakaaguwanta rami bisan ang  among status kay long distance relationship. Akong problema ron kay bisan naa nako'y uyab ba, itupo gihapon ko sa akong barkada sa ubang lalaki.  Ako na sila giingnan nga dili ko madala sa tupo kay naa nako'y uyab. Apan bisan sige ko og badlong , padayon sila nga motupo nako sa ubang lalaki. Napungot na bitaw ko,  gisamokan nako, unsa ang angayan nakong buhaton ? Modistansya nalang kaha ko nila.  — Jerick V

* * *

Jerick V,

Tulo ka pamaagi. Una, pasagdi. Ang tupo tupo, usa ka matang sa sungog sungog. Kun magpakita ka nga apektado, ikaw ang dehado. Mohupas ra na, siguro naman sa inyong grupo daghan pa’g laing hisgotanan ug kataw-anan. Kun magsugod na’g tupo tupo, ipaagi’g binuang nga kunohay kalit ka dili na makadungog. Ingna gikan ka’g doktor, ka’y nireklamo ka nga usahay ikaw bungol. Kun lahi na ang hisgotanan, ingna hala kalit nibalik ang kahait sa akong dunggan.

Ikaduha, sakyi. Kun kinsa man ang kulit nga motupo tupo nimo sa lain, ingna kamo na lang ka’y duol siya sa imong dughan. Ingna duna ka’y gipahipi nga pagnanasa niya, dugay na. Karon kay siya na ang niabli sa higayon, imo pahimuslan ug dili atrasan. Kun babaye na, lagmit makuratan, apan sa ilawom duna’y kahadlok nga basin imong tinud-on. Samot kun lalaki nga higala, lagmit siya mahawngan na. Ikatulo, mahimo ka modistansiya kanila aron ka magmalinawon. Kun pangitaon ka, sultihi sa tinuod nga hinungdan. Diha nila makita nga seryoso ka ug nirespeto sa imong relasyon. Ingna diha lang ka mobalik sa tapok kun ang pagtupo tupo ilang undangon. Angay sab sila morespeto sa imong uyab nga tua sa layo. Inay nga ipalayo ka nila sa panuway, gipaduol na hinuon. Kun dili ka pangitaon nga daw wala ka nahanaw, buot pasabot dili nimo sila tinuod nga mga higala. Ayaw la’g distansiya, biya na.  —Tito Miguel

Magpatambag ka? Ipada kang Tito Miguel: 0991-318-9366