Seguridad sa Lapu-Lapu gipahugtan

CEBU, Philippines -  Mga vital installation sa dakbayan sa Lapu-Lapu gihugtan og bantay sa kapolisan nunot sa nakaplagan nga bomba didto sa US Embassy.

Lakip sa gitutokan sa Lapu-Lapu City Police Office ang duha ka taytayan nga nagdugtong sa isla sa Mactan ug Dakbayan sa Mandaue, mga dunggoanan sa sakayan, hotels ug mga dapit nga dagsaan sa mga tawo. Hightened alert gihapon karon ang LCPO nunot sa nahitabo didto sa kaulohan diin adunay napalgang bomba sa US Embassy.

Matud ni PCIns. Jonnel Caadlawon, pangulo sa operations sa LCPO, wala silay nadawat nga hulga labot sa posibleng pagpamomba sa ilang area of responsibility apan gusto nilang makaseguro nga luwas ang katawhan. Sumala pa ni Caadlawon, nakig-alayon ang LCPO sa navy, coastguard, airforce ug aviation security unit alang sa pagpahugot pa sa seguridad. Gi-alerto usab ang tanang barangay sa pagmonitor sa panghitabo sa ilang palibot.

Giawhag ni Caadlawon ang publiko nga motaho gilayon sa higayon kun aduna silay mga kadudahan nga lihok nga mabantayan sa ilang lugar. (BANAT NEWS)