Gilas Pilipinas mobalik na’g ensayo sa Lunes
CEBU, Philippines - Magtapok na sab ang mga PBA players nga sakop sa Gilas Pilipinas pool aron padayonon ang ilang ensayo human mahunong sud sa pipila ka semana.
Ang national team nagsugod sa ilang training camp alang sa Olympic qualifier niadtong Nobiyembre diin nag-uban ang mga PBA stars matag Lunes didto sa Meralco gym.
Apan sa playoffs sa All-Filipino Cup, naundang ang ilang training camp tungod kay mitutok ang mga players sa liga.
Ning higayona, si Gilas coach Tab Baldwin naglaum nga daghan na ang moapil bisan pa’g bag-o lang gisugdan ang Commissioner’s Cup. Sayod si Baldwin nga duna gihapo’y mga key players nga dili makaduwa sama nilang Jeff Chan ug Paul Lee nga pulos adunay injury.
Dili usab maglaum si Baldwin nga makatunga sila si JuneMar Fajardo, Calvin Abueva ug Marcio Lassiter, kinsa kinahanglan og pahuway human sa makutas nga kampanya nila sa All-Filipino Cup.
Nagtinguha ang Gilas nga mopatigbabaw sa Manila leg sa Olympic qualifier bisan pa sa lig-ong mga kaatbang sama sa France, Canada, Senegal ug New Zealand. Ang modaog makakuha og pasaporte alang sa 2016 Rio Olympics sa Agosto. (BANAT NEWS)
- Latest