Sa mabugnaw’ng kaadlawon

Ako nahipugwat gikan sa pagkahinanok. Bugnaw ang kaadlawon ug maoy mibathay sa akong panumdoman ang mga hitabo sa kagahapon. Naglisud ko og tulog....mao nga akong gipasiga ang mga dagitab nga suga   aron mahayagan ang libro nga pagabasahon ug ang libro sinuwat sa paborito nakong author nga si Diarmuid O. Murchu ang ulohan: Inclusivity A Gospel Mandate. Dunay hilisgotan nga nagtudlo kalabot sa proper mapping kung maghisgot na kita sa kultura sa Table Fellowship. Kini naglambigit sa Map of Places, Times, Persons ug uban pa. Sa laktod ingon ana sila ka elaborate kun maghisgot na kita og ritual purity. Sa laktod daghan kaayo ang mahitabong protocols. Apan human nako kini mabasa daw sa nahanaw lang sa akong panumdoman ang mga hustong termino ug ideya pinasikad sa maong libro. Ang akong nahinumdoman lang mao nga ang pagkaon dili lang mahitungod sa ritwal ug kinsay imohang kuyog ni unsa ang imong kan-on. Mahitungod kini sa mahimong mahitabo sa tawo o ni bisan kinsa nga imong gikakuyog pagkaon nianang taknaa.

Nihigop ko og kape ug akong giingkit ang nagbinugtong nga pan sa akong pag-inusara uban ang pagsuhid sa akong imahinasyon kun nahilandig na ba ang akong hunahuna ug pagbati sa dapit diin nagpuyo ang mga katawhan ni Arwen samtang padayong nanghasi ang mga Goblins aron gukdon si Frodo Baggins.