Si Digong ug Leila

Kumbinsido si Presidente Rodrigo Duterte sa nahuptan niyang mga ebidensiya nga maglambigit ni Senador Leila de Lima sa ilegal nga drugas. Sa iyang bahin, si De Lima niinsistir nga 100% siyang makapasalig nga wala siya mahilambigit ni nakadawat og kuwarta gikan sa mga sindikato sa ilegal nga drugas.

Naa sa opensiba ang administrasyon. Gidasonan sa Department of Justice (DOJ) ang mga pasangil ni Duterte pinaagi sa pagpahibawo nga dunay unom ka saksi nga momatuod nga tigdawatan og kuwarta sa drugas si De Lima, kinsa nipasidaan nga mauwawan si Duterte tungod sa minao-mao nga mga ebidensiya ug pinugos nga mga testimoniya.

* * *

Sa sunudsunod nga mga diskurso ug press conferences ni Duterte, si De Lima ang sentro sa iyang atensiyon:

Iyang gibutyag nga intelligence information gikan sa laing nasud nga naglakip sa mga istorya sa mga tawag sa telepono gikan ug paingon sa New Bilibid Prisons (NBP) maoy nakabisto sa kalambigitan ni De Lima pinaagi sa iyang kanhi drayber; ug

Ang imoral nga pakiglambigit ni De Lima sa iyang kanhi drayber  nga si Ronnie Dayan, nga dakong minyo, ug ubang kalalakin-an ug ang kahakog nga dili na niya kapugngan maoy nakaaghat ni De Lima sa pagdawat og kuwarta gikan sa drug lords nga natanggong sa NBP.

* * *

May nangagi na hinuong mga higayon nga naneguro si Duterte sa kalig-on sa iyang mga ebidensiya apan siya ra sab ang labing una nga niangkon nga dili diay makabarug ang mga ebidensiya sa korte.

Sama sa iyang pasidaan sa gipasanginlang drug lord nga si Peter Lim nga iyang ipapatay inig gawas sa ayroplano sa Ninoy Aquino International Airport (NAIA). Apan dihang niatubang si Lim niya, giawhag siya ni Duterte nga tabangan ang mga imbestigador pag-absuwelto ni Lim.

Sa una niyang pasangil ni De Lima, di pa kaayo siya kumbinsido: Niangkon si Duterte nga wa siya makaseguro kun ang kuwarta sa drug lords sa NBP nga nadawat ni Dayan, aktuwal ba gyud nga nadawat ni De Lima.

* * *

Ang mosunod nga mga adlaw makatabang sa katawhan sa pag-ila kinsa ang nagsulti sa tinuod nilang Duterte ug De Lima. Motambong ang mga saksi sa DOJ batok ni De Lima atol sa imbestigasyon sa House of Representatives sa kapakyas sa niaging administrasyon pagbadlong sa negosyo sa ilegal nga drugas sa NBP.

Sa iyang bahin, si Duterte nipasidaan sa mga tagduma ug mga piniriso sa NBP nga ikiha sila kun dili motabang sa imbestigasyon batok ni De Lima. Apan si De Lima, nga gihulagway ni Duterte nga payter kay guwapa lang gihapon bisan sa mga pangatake, naneguro nga kun ang tuyo ni Duterte mao ang pagpaluhod niya, karon pa lang makapasalig na siya nga mapakyas ang labing gamhanang opisyal sa nasud.

([email protected])