Mga pinabuthang isda sakmit, tulo ka tawo sikop
CEBU, Philippines - Sobra sa 2,000 ka kilong giingong pinabuthang isda ang nasakmit kagahapon sa kadlawon sa gipahigayong operasyon sa Bantay Dagat uban sa Maritime Police ug Bureau of Fisheries and Aquatic Resources (BFAR)-7 diha sa Pasil Fish Market, dakbayan sa Sugbo.
Si Michael Guerra, Bantay Dagat Program Director mibutyag nga gibana-banang mokabat ngadto sa P280,000 ang balor sa maong mga isda ug kasagaran niini mga mamsa ug giingong gikan kini sa Zamboanga City. Matud ni Guerra nga nailhan nila ang nagpadala sa maong mga pinabuthang isda ug gikatakdang pasakaan nila kini og kaso.
Apan ang handosan sa maong mga isda diha sa merkado maglisud sila niini og pasaka og kaso tungod kay kasagaran kanila mohimakak nga wala sila’y kalibutan kon pinabuthan ba ang isda nga gihandos diha kanila.
Sa laing bahin, tulo ka tawo kinsa giingong nagpahigayon og ilegal nga panagat diha sa kadagatan sa Barangay Hilotongan, lungsod sa Bantayan ang nasikop niadtong Huwebes sa buntag atol sa gipahigayong operasyon sa kapolisan sa Bantayan Police Station ug Bantay Dagat Task Force sa lungsod.
Apan ang tag-iya sa pumpboat nga gigamit nila sa pagpanagat nga si Crispin Santillan ang naka-eskapo.
Ang mga nasikop mao sila si Marlon Destura, 42-anyos, minyo, taga Barangay Kabac, kapitan sa pumpboat, Henry Ofianga, 45-anyos, minyo, chief engine mechanic, Buenafe Layos, 40-anyos, minyo, taga barangay Kaongkod, Madridejos, assistant engine mechanic. Nasakmit gikan sa mga dinakpan ang 50 ka banyera nga isda nga mobalor ngadto sa P25 mil, commercial fishing boat o zipper nga mobalor og P1 milyon.
Matud ni Police Chief Inspector Florendo Fajardo, hepe sa Bantayan Police Station, naaktohan ang mga dinakpan nga nipahigayon og pagpanagat gamit ang active gear ug fishing net nga gidili sa balaod ilabi na sa pagpanagat diha sa kadagatan sa Barangay Hilotongan. Ang mga dinakpan temporaryong nadetener diha sa Bantayan Police Station detention cell. Janine Ramil and Rowena D. Capistrano with Melchor M. Villacorta (BANAT NEWS)
- Latest
