Riding-in-tandem gipabantayan

CEBU, Philippines - Gipahimangnoan ni Deputy Mayor for Peace and Order, Konsehal Dave Tumulak ang mga katawhan nga mag-amping kay nigara na usab ang mga tulisan ug mga riding-in-tandem.

Atol sa pakighinabi ni Tumulak sa Banat News, siya miingon nga daghan siyang nadawat nga mga reklamo kabahin aning mga riding-in-tandem nga mga kriminal nga namiktima.

Iyang giawhag ang mga sumasakay nga dili mogamit sa ilang mga cellphones ug dili pagsul-ob sa ilang mga alahas samtang naglakaw sa dalan ug samtang nag sakay og pasaheroan.

Si Tumulak nihangyo sa PNP nga dili lang kay ang ilegal nga drugas ug sugal ang hatagan sa ilahang pagtagad, apilon pud ang mga ginagmay nga mga kaso sama niining tulis.

Nasayran pud ni Tumulak sa ilang panagtapok niadtong Biyernes nga taga gabii ra mo-duty ang mga barangay tanod. Walay hapon ug buntag.

“Ato pud gihangyo ang atong mga tanod sa ilang visibility sa ilahang mga area ug moabag sa mga kapulisan especially during peak hours ug kaadlawon kay anang mga orasa sagad mahitabo ang mga kaso sa tulis,” asoy pa ni Tumulak. (BANAT NEWS)