Nieskapo nga piniriso gibartolina

CEBU, Philippines - Gipaneguro sa kadagkuan sa Cebu Provincial Detention and Rehabilitation Center nga luwas sulod sa prisohan ang nieskapo nga piniriso nga si Arnel Mait kinsa nadakpan niadtong Biyernes sa gabii sa Negros.

Matud ni Bobby Legaspi, acting assistant jail warden, nga anaa gibutang si Mait sulod sa usa ka isolation cell.

Tungod usab niini suspendido ang iyang mga pribilihiyo lakip na ang dalaw.

Matud ni Legaspi nga usa sa hinungdan nga gi-isolate si Mait aron dili siya mahilabtan sa ubang piniriso kinsa naglagot kaniya nga maoy hinungdan nga nasuspenso ang ilang mga dalaw.

Gitataw ni Legaspi nga kung adunay mahitabo ni Mait sa sulod posibleng masuspenso na sab ang dalaw.

Si Legaspi nagkanayon nga anaa ra kang Gobernador Hilario Davide III kinsa maoy acting warden karon kung kanus-a magpabilin sa isolation cell si Mait.

Si Mait nieskapo niadtong Hulyo pinaagi sa pagpakaaron-ingnon nga usa sa mga dalaw. (BANAT NEWS)