Ang Magkapatid (36)
“PERO kapag mayroon kang assignment sa school, unahin mo yun. Bitawan mo ang pagsi-xerox dahil mas prayoridad ang pag-aaral,” payo ni Ipe kay Ada.
“Oo Kuya. Siyempre mas priority ko ang pag-aaral.’’
“Kapag wala akong pasok sa fastfood at sa school, ako ang mag-ooperate.’’
“Oo Kuya.’’
“Kapag nasa high school ka na kailangang nakatutok ka na sa studies mo. Gusto ko, makapasa ka rin sa entrance exam sa unibersidad na pinapasukan ko para kaunti rin ang tuition fees.’’
“Nursing ang kukunin ko Kuya. Talagang yan ang gusto ko. Noon pa, yan ang pangarap ko.’’
“Kaya pagbutihan mo ang pag-aaral. Gagawin ko ang lahat para makapagtapos ka ng nursing. Kaya nga gagawin ko ang lahat para makatapos ng Accounting at makapagtrabaho para mag-aaral ka na lang nang mag-aaral. Hindi ka na kailangang mag-xerox pa o kaya ay magtinda.’’
“Gagawin ko ang lahat Kuya. Pagbubutihin ko ang pag-aaral at makatapos ng nursing.’’
“Malaki na ang suweldo ng nursing ngayon. Baka makapag-abroad ka pa.’’
“Kapag nakapag-abroad ako, ibabalik ko lahat ang pinagpaaral mo Kuya at may interest pa, ha-ha-ha!’’
“Kahit na walang interest, puwede na.’’
“Siyanga pala Kuya, yung lalaking nakita mo sa fastfood, nakita mo uli?’’
“Hindi na.’’
“Ano nga kaya ang motibo ng lalaking iyon at laging nakasubaybay sa atin?’’
“Hindi ko nga alam.’’
“Di ba nasabi ko nun na baka si Papa ang nasa likod nang pagsubaybay ng lalaking ‘yun. Baka may gustong malaman o baka nais tumulong sa atin.’’
“Hindi natin kailangan ang tulong niya. Tatayo sa sariling paa.’’
“’Yung kayang matapobreng matanda, buhay pa?’’
Walang reaksiyon si Ipe. Wala siyang pakialam sa matapobreng matanda na umapi sa kanyang mama noon.
ISANG umaga, binisita ni Karla sina Ipe at Ada. Mayroong ibinalita sa dalawa.
“Mag-a-abroad na ako next week,” sabi nito.
“Saan ka pupunta, Ninang?’’ tanong ni Ada habang nasa harap ng copying machine.
“Sa Hong Kong, DH.’’
“Natuloy ka rin pala, Tita Karla.’’
“Oo. Wala na kasing pag-asa na makakuha ng puwesto sa palengke.’’
(Itutuloy)
- Latest
