Kaapiki sa mga way bakuna
Gaan akong paminaw nga nisud sa shopping mall sa Mandaue City kay wa nay face shield. Nabawo hinuon dihang gipangitaan sa babayeng tigbantay sa akong vaccination card. Duna diay executive order si Mayor Jonas Cortes nga ang mga bakunado ray makasud sa malls.
Dungan sa pagpasabot nga nahibilin ang card sa bay, nanaguto sa wa pagtagad sa tanyag sa akong higalang taguon lang nato sa ngan nga Manny Limtong sa Lim Tong Press nga ipada ang letrato sa akong card aron iyang mapatik nga sama kadako sa pitaka ug ma-laminate.
* * *
Huyhoy akong abaga nga mobiya na unta dihang nahinumdom nga akong naletratohan ang card dihang nangaplay og vaccination certificate sa Department of Health (DOH) pila na ka buwan ang nilabay.
Nisugot ang babaye nga makasud ko dihang nakit-an ang letrado sa card. Di sama kadaghan ang mga nag-una nako sa sud. Tingali di ako ray nakalimot. Nibalik og gaan ang akong paminaw pagkaamgo nga mahimong mas luwas sa sud kay bakunado ming tanan. Hangtod nga nakahinumdom sa pasidaan sa mga siyentipiko nga ang Omicron mahimong makalusot sa mga bakuna.
* * *
Maayo na lang nga wa sunda ni Mayor Cortes ang binuang nga lagda sa ubang local government units nga VaxCert ra sa DOH ang ilang dawaton nga pruyba sa full vaccination. Kay nakaseguro kong daghan ming gisiyam-siyaman nag pinaabot.
Wa hinuon ko masina sa akong mga kaila nga nakadawat na sa soft copy sa ilang VaxCert. Nga ang pipila di magamit kay sayop ang spelling sa first name o last name o petsang natawhan.
* * *
Nakahunahuna ko samtang nagsuwat ini sa akong mga kaila nga nagdumili sa pagpabakuna. Kay nakumbinser nga makamatay o mas makadaot ang mga bakuna. Angayng tahuron ang ilang katungod sa pagbalibad. Pero ambot molahutay ba gihapon sa ilang pagtuo.
Kay nagkagamay nang ilang kalibotan. Ang mga nagtrabaho nga nibalibad sa libre nga bakuna pagastuhon na og P2,500 sa PCR test kada duha ka semana. Ug ang mga sama nako nga masugoan sa ilang mga asawa nga di ganahang mogawas sa bay, kinahanglan nang motabok sa laing syudad o lungsod nga wa pa kahunahuna sa pagpangita og vaccination card.
- Latest
