Pagtultol sa gigikanan
Natubag nang dugay natong pangutana: Diin man gikan ang mga panit sa baboy nga nahimong chicharon sa Carcar City sa habagatang Sugbo. Gitino sa National Meat Inspection Service (NMIS) nga gikan sa gawas sa nasud ang labing mahinungdanong sangkap sa chicharon.
Gipanghimakak hinuon sa NMIS ang mga huhungihong nga kinompra gikan sa China ang karneng baboy nga gihimong chicharon. Matod ni Dr. Alvin Lean, ang Senior Meat Control Officer ug Pangu sa Accreditation and Registration Section sa NMIS, gidid-an nila ang pagsud sa karne gikan sa China sukad pa sa una.
***
Nipasabot si Lean wa tugoti sa NMIS ang karne gikan sa China bisan sa wa pa mokatap ang African Swine Fever tungod sa daghan uyamot nga sakit nga nitakboy sa ilang mga hayop, labi na sa mga baboy. Maong way epekto sa suplay sa karne sa Pilipinas, apil na sa industriya sa chicharon sa Carcar, ang pagdili sa importasyon sa karneng baboy gikan sa ubang kanasuran.
Kay gawas sa China wa sab ta mangompra gikan sa laing walo ka nasud: Japan, Belgium, Hungary, Latvia, Poland, Romania, Russia, ug Ukraine.
***
Gitataw ni Lean atol sa Arangkada sa dyAB Abante Pa, Bisaya! nga wa makamenos ang mga tighimo og chicharon sa lokal nga suplay sa mga panit sa baboy. Mao ni ang mga hinungdan nganong nagsalig sila sa importasyon:
•Mas barato ug mas daghan ang imported nga karne; ug
•Mas lisod lutuon ang chicharon gikan sa lokal nga mga baboy kay di managsama ang pangedaron, samtang ang imported managsama og higayon nga gipatubo ug gipangihaw.
***
Taym pa, diin man g’yud diay gikan ang chicharon sa Carcar?
Gipaneguro ni Lean nga luwas ang imported nga karne kay gisubay sa Bureau of Animal Industry sa Department of Agriculture, NMIS ug local government units gikan sa pag-abot sa mga pantalan ug tugpahanan ngadto sa mga tindahan ug kamerkadohan hangtod sa mga pinuy-anan sa mga konsumidor.
Sunod nimong ingkib sa chicharon sa Carcar, nipasalig si Lean nga luwas kay ang giprito nga mga panit sa baboy gikan sa Alemanya. Di hinuon siyang kapasalig nga way nakalusot nga smuggled nga karne. Apil nang gikan sa, nakatag-an ka, China.
- Latest
