Way polis nga nagtikaw-tikaw
ARANGKADA - Leo Lastimosa (The Freeman) - May 17, 2018 - 9:49pm

Pormal nang niawhag si kanhi Daanbantayan mayor Maria Luisa Loot nga tangtangon ang hepe sa kapolisan sa lungsod nga si Senior Inspector Irish Delim. Kini tungod sa giingong kapakyas ni Delim sa pagdestino og mga polis sa bag-ong pantalan sa Maya nga mao'y nahitaboan sa pagpangrakrak sa ilang pamilya niadtong Domingo, bisperas sa piniliay sa barangay ug Sangguniang Kabataan.

Nitug-an si Loot sa dyAB Radyo Patrol nga kay wa may polis nga nagtikaw-tikaw ang mga suspek nga nagbitbit og Armalite rifles gawasnon nga nagbahas-bahas sa pantalan dayong pangrakrak sa pagdunggo sa ilang bangka.

***

Matod ni Loot ang kapakyas sa pagbadlong ug pagdakop sa mga responsable sa pagpangrakrak sa ilang pamilya mao lay kataposan sa nagkataas nga listahan sa mga bulilyaso sa kapolisan ubos ni Delim. Kinsa iyang gihulagway nga nigara human hukasi ang iyang bana nga si Daanbantayan Mayor Vic Loot sa gahom pagsuperbisar sa mga polis.

Maglisod og sabot si kanhi mayor Loot sa deployment sa mga polis sa ilang lungsod: Bisan sa kadaghan sa mga namiyesta nga nagsud-gawas sa Malapascua, usa ra ka polis ang gidestino sa isla ug way polis sa Maya.

***

Sa iyang bahin, nipatin-aw si Delim dihang nahinabi ni Rhea Soco sa dyAB Radyo Patrol nga usa ra ka polis ang iyang gidestino sa Malapascua ug nauwahi siya pagpada og mga polis sa pantalan sa Maya kay nahigot ang ubang mga polis sa pagduma sa checkpoints ug ubang pangandam sa piniliay niadtong Lunes.

Matod ni Delim nga bisan sa pasangil ni kanhi Mayor Loot wa siya magkuwang sa pagpangu sa kapolisan pagpanalipod sa mga molupyo sa Daanbantayan.

***

Subling nipadayag sa iyang kahimangod si kanhi Mayor Loot sa pahibawo sa tigpamaba sa PNP nga si Chief Superintendent John Bulalacao nga wa pa isalikway sa mga imbestigador ang kahigayonan nga ang mga Loot ra sab ang nagpasiugda sa pagpangrakrak aron pagkuha sa simpatiya sa publiko.

Matod ni kanhi mayor Loot may sukaranan ang pagduda kon iya rang bana ang girakrakan. Apan nitataw nga lisod tuohan nga mangahas sila sa pagrisgo sa inosente nilang mga apo apil nang unom pa ka buwan nga kamanghoran sa ilang anak nga si Luis.

leo_lastimosa@abs-cbn.com

MARIA LUISA LOOT
Philstar
Facebook
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with