Di espesyal si Lim
Sa akong pagsuwat ini, natanggong pa sa detention cell sa Cebu City Police Office (CCPO) si David Lim Jr., ang suspitsado sa pagpusil sa nurse nga iyang gikalalis tungod sa trapiko sa Kamputhaw, Cebu City niadtong Domingo sa kadlawon. Apan di magdugay ang iyang kalbaryo.
Kay kon mahingpit nang inquest ni Cebu City Prosecutor Ma. Theresa Casiño, nga matinud-anong nisubli sa mga ebidensiya nga gisumiter sa kapolisan, ug pormal nang mapasaka ang mga kasong kriminal sa korte, makapahimus dayon si Lim sa temporaryo niyang kagawasan bisan pila pay piyansa nga itakda sa huwes.
***
Ang mosunod maoy momatuod nga way sukaranan ang mga pasangil nga espesyal ang pagtagad sa kapolisan ug ubang mga opisyal sa gobyerno ni Lim:
1.Di man tingali kahibudngan nga sa duha ka adlaw niyang pagtagu-tago sa Sugbo wa gyod siya makit-i sa mga polis;
2.Kasarangan man sab tingali nga opisyal sa Malakanyang nga si Presidential Aide Bong Go, hepe sa PNP nga si Direktor Heneral Bato dela Rosa ug suod nga higala ni Presidente Rodrigo Duterte nga si Peter Go ang naghikay sa iyang pagsurender ngadto sa Police Regional Office (PRO 7);
***
1.Normal man tingali nga si PRO 7 Director Noli Taliño nahimong suluguon sa pamilyang Lim, nga maoy nagbuot unsang orasa siya mosurender (alas-2 sa kadlawon niadtong Martes), asa siya ipahimutang (sa aircon nga buhatan sa Regional Intelligence Division) ug unsay iyang seguridad (nag-full battle gear nga SAF commandos);
2.Lisod sang lalison nga inay magpahiling sa mga doktor sa Cebu City Medical Center (CCMC) nga maoy kasagarang gihimo sa ordinaryong mga dinakpan sa di pa ibalhog sa prisohan, si Dr. Benjamin Lara sa Scene of the Crime Operatives (SOCO) ang niduol niya;
***
1.Kasarangan ra nga gibakante ang tibuok selda sa Kampo Sotero Cabahug, ang headquarters sa Cebu City Police Office (CCPO) pinaagi sa pagbalhin sa ubang piniriso ngadto sa ubang presinto ug prisohan ug gihawanan ug gilimpiyohan para lang gyod niya; ug
2.Makitawhanon lang nga gitugotan siyang makapasud og banig ug unlan ug electric fans, mga pribilehiyo nga gihikaw sa tapad niyang selda nga gipunsisokan sa ubang mga piniriso (nga wa hinuon mangreklamo kay giaporan sa iyang pamilya og ice cream).
- Latest
