“Born to be wild”, 19 anyos na
CEBU, Philippines — Alang sa dagat, kinabuhi ug kaugmaon maoy sentrong mensahe sa award-winning wildlife program nga Born to Be Wild sa pagsaulog niini sa ika-19 nga anibersaryo karong buwana Oktubre.
Sulod sa dul-an duha ka dekada, mas gipaduol sa programa ang viewers sa bahandi sa wildlife ug natural heritage sa Pilipinas.
Sa espesyal nga episodes karong buwana , mobiyahe sila Doc Ferds Recio ug Doc Nielsen Donato ngadto sa mga hilit nga dapit sa dagat aron masuta ang mga sensitibong ekosistema ug ang mga kausaban nga dala sa nag-usab nga klima.
Magsugod ang anniversary special karong adlawa , Oktubre 4 pinaagi sa episode nga “Laban ng Ating Karagatan: Ito ang Ating Yaman.” Sa maong episode, tukion nila ang marine ecosystem sa Tubbataha ug ang hilit nga Lawak Island.
Karong Oktubre 11, ipasalida ang “Laban ng Ating Karagatan: Para sa Kalikasan,” diin mobalik si Doc Ferds sa Tubbataha Reefs Natural Park. Didto iyang masinati ang usa sa iyang pinakalawom nga dive ug makita sa duol ang dagkong marine animals sama sa tiger sharks, hammerheads, manta rays ug whale sharks.
Samtang karong Oktubre 18, moadto si Doc Nielsen sa Pag-asa Island pinaagi sa episode nga “Laban ng Ating Karagatan: Ito ang Ating Pag-asa.” Gipuy-an kini sa kapin 400 ka Pinoy ug mao lamang ang inhabited island sa pito ka isla ug duha ka reef sa Kalayaan Island Group.Sa kataposang episode sa anniversary special , Oktubre 25, ipasalida ang “Laban ng Ating Karagatan: Para sa Kinabukasan.” Dinhi tukion nila ang mga hagit nga giatubang sa marine wildlife ug sensitibong ekosistema.
Sa Lawak Island, madiskobrehan ni Doc Nielsen nga gigamit sa mga seabird ang mga plastik nga basura sa paghimo sa ilang mga salag, usa ka hulagway sa epekto sa marine pollution bisan sa hilit nga mga utlanan sa nasud .
Ang 19th Anniversary Special sa Born to Be Wild ipasalida matag Domingo sa Oktubre, alas-9 sa buntag sa GMA, nga nag-awhag sa publiko sa paghatag og pagtagad sa pagpanalipod sa kadagatan alang sa wildlife, komunidad ug sa kaugmaon sa nasud .
- Latest
