Mahadlok modiskarte

Dear Tito Miguel,

Ako diay si Oliver, 23 anyos, taga Tuburan, Cebu. Nagsulat ko kay gusto unta ko mangayo og tambag bahin sa akong gibati sa usa ka babaye nga dugay na nakong gihigugma sa tago.

Ang iyang ngalan kay Rej. Dugay na nako siya nga crush ug ganahan ko niya kay buotan, matinabangon, ug dali ra makig-uban sa mga tawo. Kada magkita mi, malipay gyud ko bisan simple ra nga panag-istorya.

Ang problema lang, daghan kaayo ang nanguyab kaniya. Naay mga gwapo, naay kwartahan, ug naa pud tong mga dugay na kaayo nga nagkuyog-kuyog niya. Tungod ana, murag nawad-an ko og kumpyansa sa akong kaugalingon. Usahay moingon ko sa akong kaugalingon nga basin wala na koy paglaom kay daghan na kaayo ko og kompetensya .

Ganahan gyud ko modiskarte, pero mahadlok ko nga basin balibaran lang ko. Mahadlok pud ko nga basin madaot ang among maayong panaghigalaay kung masayran niya nga dugay na diay ko nga naay pagbati para niya.

Tito Miguel , unsa man gyud ang angay nakong buhaton? — Oliver

* * *

Oliver,

Kani ang buhata, ingna dugay na ka gusto magpadayag niya apan mahadlok ka balibaran niya, o dili ba kaha maguba inyong panaghigala. Busa mananghid ka nga dili na magpakita niya, kay kahibalo ka wala ka’y bawot sa mga nanguyab niya.

Sa maong paagi, diha nimo makita unsa ka niya o asa ka dapit sa iyang dughan. Kun igo ra siya mokatawa, ingna nga tinud-on nimo siya. Paniid sa reaksyon, kun mabantayan nimo nga mora siya’g nagpatagad, ipakita nga pursigido ka.

Kun wala’y reaksyon, pasagdi lang. Ingna imo sabton nga wala kay pag-asa niya. Kun wala siya’y buhaton, lagmit wala gyud ka’y paglaom. Pero kun moingon ngano kinahanglan magpalayo man ka, kana dako ang purohan nga nakagusto siya nimo. Nagpaabot lang sa imong lakang.

Usahay man gud nagdako lang ang imong hunahuna. Para nimo walay paglaom, apan wa ka kahibalo dugay na siya nagpaabot nimo. Busa kinahanglan ka magpadayag. Bahala’g unsa iyang reaksyon, ang importante nakasulti ka. Kaysa magsige ka’g lungot lungot unsa kaha kun imo lang gisuwayan.

Karon kun dili gyud diay siya interesado nimo, dawata na lang. At least imo gisuwayan, kaysa wala kay gibuhat unya ang higayon nilabay lang. Timan-i, kinahanglan duna kay buhaton aron makuha nimo ang gusto nimo kab-oton. --Tito Miguel

Magpatambag ka? Ipada kang Tito Miguel: 0991-318-9366