Problema sa marupok

Dear Tito Miguel ,

Maayong adlaw , ako  diay si  Gian ,  23 anyos , taga San Fernando , Cebu . Gusto unta ko mangayo ug tambag bahin sa akong uyab nga si Shane. Guwapa kaayo akong uyab busa dili gyud malikayan nga daghan ang maibog kaniya .

Nasakpan   nako nga naa siyay  laing  lalaki. Dili lang usa ka higayon  nahitabo kundi tulo na ka higayon. Kada masakpan nako, mangayo siya’g pasaylo ug moingon nga mag-usab  na siya. Tungod kay love nako siya, pasayloon nako siya permi . Dili nalang ko modetalye kun giunsa nako siya pagsakop.

Gitambagan ko sa akong mga higala nga magmata na sa kamatouran , apan marupok gihapon ko . Unsa  may sakto nakong buhaton? Ganahan ko nga ma-let go dayon nako siya . Tabangi ko nga  mawala akong pagka-marupok . —Gian

* * *

Gian,

Aron dili na ka mahilis sa iyang kaanyag, hunahunaa nga sa ka tulo ka beses nimo siya nasakpan, dako’g purohan nakighilawas siya sa uban. Ang mga lalaki nga iyang kaduwa’g kalayo maniguro gyud na matilawan siya.

Gamita imong imahinasyon kun sa kama unsa ilang gibuhat. Kun isilsil na nimo sa imong alimpatakan, duna’y purohan lud-on ra ka niya. Gani, basin pa gihisgotan ka nila, basin pa nisulti siya wala siya matagbaw kanimo mao nga nipatol siya sa lain.

Kun kahibawo ang mga lalaki nga duna siya’y uyab, mangutana gyud na parte ninyongduha. Posible pa gani gilimod ka. Basin pa niingon wa na mo’y klaro aron ang lalaki mas ma-enganyo. Mao na’y duwa sa mga mabudhion, bakakon ug malinglahon. Apan kun masakpan na, itoy itoy dayon.

Lagmit dali ra ka madala sa hilak samtang nangayo siya’g pasaylo. Timan-i, ang luha hinagiban aron ka makontrolar. Kun magpadala ka sa pagtulo niini, sayon ra kaayo ka ulo-ulohan.

Hunahunaa, posible sobra pa sa tulo iyang gitiliwan, apan tulo ra imong nasakpan. Unya’g magpadayon mo, wala’y garantiya nga dili niya usbon. Natural ra niya ang makighilawas sa lain maski wala’y commitment. Casual sex ba. 

Gani, angay ka mahadlok sa sexually transmitted diseases. Kun sige siya’g duwa sa lain nga team, basin di lang sakit sa dughan iyang ihatod kanimo, kun dili ang sakit mismo. Kun magpadayon tungod ka’y marupok ka, ayaw na kakugang kun mamabdosan siya sa lain ug ikaw ang mobarug nga amahan. Tito Miguel

Magpatambag ka? Ipada kang Tito Miguel: 0991-318-9366