“Queen Mantis” misikad na sa ere

CEBU, Philippines — Napuno sa  misteryo ug kahadlok ang gidalit sa  sikat nga Korean drama nga “Queen Mantis” nga gi-ere na niadtong Lunes, Mayo 4,  9:30PM, sa ABS-CBN pinaagi sa ALLTV2, A2Z, Kapamilya Channel, ug iWant. Gibitoonan kini sa Korean stars nga sila Jang Dong-yoon ug Go Hyun-jung. Dali kining nakaangkon og dakong suporta gikan sa viewers  atol sa pagsikad niini sa kahanginan.

Naglibot ang istorya sa karakter ni Jeong I-Shin (Go Hyun-jung), usa ka iladong serial killer nga gitawag og “Mantis,” nga nakapatay og lima ka lalaki duha ka dekada na ang nilabay. Target niya ang mga lalaking nang-abuso sa kababayen-an ug kabataan, hinungdan nga nagdala siya og kontrobersyal nga reputasyon. Samtang ang iyang anak nga si Cha Su-Yeol (Jang Dong-yoon), nga midako nga puno og kasuko batok sa iyang inahan, nahimong pulis sa ulahi.

Sa dihang motungha ang usa ka misteryosong serial killer nga nagsundog sa estilo sa pagpatay sa “Mantis,” mapugos si Cha Su-Yeol nga mangayo og tabang sa iyang inahan aron masulbad ang kaso.

Subay sa istorya, matuki kung unsay mahitabo sa ilang panagkita pag-usab isip mag-inahan ug kung makatabang ba gyud si Jeong I-Shin o makadugang hinuon sa kagubot sa imbestigasyon.

Task Force Alpha ug Metal 13 gipaila sa “Blood vs Duty”

Nagpadayon ang kainit sa aksyon sa hit primetime series sa ABS-CBN nga “Blood vs Duty,”  kun diin si Gerald Anderson nagpakita og laing level  sa iyang pag-arte isip usa ka undercover agent aron mabutyag ang kamatuoran sa pag-atake sa  komunidad.

Sa maong serye, gidala ni Geral  ang papel ni P/Maj Allan Espina, usa ka police officer nga misulod isip undercover aron matuki ang misteryo sa krimen. Kabahin kini sa  selebrasyon sa ika-20 ka tuig sa industriya sukad sa iyang pagsugod sa Pinoy Big Brother niadtong 2006. Sa istorya, nagdala siya og dual role isip Allan, usa ka special liaison officer sa Muslim Affairs, ug Jalil, ang maisog nga tigpanalipod sa komunidad.

Makig-atbang siya sa karakter ni Richard Gutierrez nga si Marcus, ang ahente nga nangulo sa pag-atake ug pagkidnap  sa iyang amahan nga si Datu Rahman, nga gidala ni Jaime Fabregas.

Gipahibalo usab sa JRB Creative Production ang mga bag-ong artista nga modugang sa kalig-on sa serye. Lakip niini sila Yves Flores, Marc Abaya, ug Joem Bascon nga maglangkob sa grupo nga Metal 13. Samtang sila River Joseph, L.A. Santos, Albie Casino, Lou Yanong, ug Ejay Falcon maoy mahimong miyembro sa bag-ong Task Force Alpha.

Apil usab sa cast si Senador  Robin Padilla nga nagdala sa papel ni Ahmad Mustapha, ang yawi  sa pagsulod ni Allan sa gobyerno.

Nagpabilin nga pangutana kung magmalampuson ba si Allan sa pagbutyag sa kamatuoran o mapugngan ba siya ni Lara, nga gidala  ni Bela Padilla, nga nagduhaduha sa iyang presensya .

Makita  ang “Blood vs Duty” matag Lunes hangtod Biyernes, alas 8:00 sa gabii sa ABS-CBN pinaagi sa ALLTV2, A2Z, Kapamilya Channel, ug Kapamilya Online Live. Makita usab kini sa  Netflix ug iWant.

Sa laing bahin , magkauban usab sila Gerald  ug Baron Geisler sa talk show nga “Stars on Stars,” diin ilang hisgutan ang ilang mga kasinatian sa serye ug sa showbiz. Makita ang  maong episode karong Sabado, Mayo 9, alas 7:00 sa gabii pinaagi sa Jeepney TV Facebook page ug YouTube channel.

Nataypan dayon

Kasamtangang nag-una sa iWant ang unang  vertical drama sa ABS-CBN Studios nga  “The Chambermaid’s Daughter”.  Nakabaton dayon kini og  lima ka milyon nga views  sa unang lima ka episodes  niini.  Ang maong vertical drama kay gibidahan nila Alexa Ilacad ug Gelo Rivera.

Lig-on nga guests

Gianunsyo na sa Filipino-American singer  nga si Jessica Sanchez ang iyang star-studded  lineup sa  guests sa umaabot niya nga konsyerto karong Mayo 16 sa  Araneta Coliseum. Kini naglangkob nila Vice Ganda, Regine Velasquez, Gary Valenciano, Martin Nievera, Morissette Amon, James Reid, ug  Darren Espanto.

Combo On The Run

Makita na sa Netflix sugod karong Mayo 30 ang "Combo On The Run", ang documentary film  sa  OPM band nga  Eraserheads. Makita kini sa  190 ka mga nasud. “Incredibly humbling,” mao kini ang paghulagway sa director-producer niini nga si Maria Diane Ventura kalabot sa international  release sa maong documentary film.

Dingdong mobalik sa primetime pinaagi sa “The Master Cutter”

Gitak-ang na sa  GMA Network og bag-ong action –drama series  nga “The Master Cutter,” nga nagtimaan sa grand primetime comeback sa award-winning actor nga si Dingdong Dantes. Uban sa tema nga “Redemption is never easy, but it is always worth fighting for,” gilauman nga maghatag kini og bag-ong level sa kalingawan sa primetime.

Sugod karong Mayo 11, makita si Dingdong sa usa ka komplikado ug makapukaw nga papel isip Anthony “Atoy” Padua, usa ka batid nga Scout Ranger nga mipili og malinawon nga kinabuhi isip mananahi. Apan, luyo sa iyang simple nga tailoring shop, nagtrabaho siya isip usa ka man-hunter ug tracker-for-hire, nga motabang sa mga tawo sa pagpangita og hustisya, gikan sa pagdakop sa mga kriminal hangtod sa pag-recover sa mga gikawat nga manok panabong.

Gisundan sa serye ang personal nga pakigbisog ni Atoy human sa kamatayon sa iyang uyab nga si Elaine, nga gidala ni Max Collins. Samtang naningkamot siya sa pagbangon pag-usab ug pagpalig-on sa relasyon sa iyang amahan pinaagi sa pagdumala sa negosyo sa pamilya, usa ka bag-ong kaso ang moabot nga mahimong makausab sa iyang kinabuhi.

Nagsagol sa “The Master Cutter” ang family-oriented nga drama ug intense nga aksyon, diin matag semana maghatag og bag-ong sugilanon ug kasinatian sa mga manan-aw. Apil sa lig-on nga cast sila Shuvee Etrata, Sienna Stevens, Jo Berry, ug Paolo Contis, uban pa nila Tonton Gutierrez, Joey Marquez, Polo Ravales, Ketchup Eusebio, Max Eigenmann, ug Rio Locsin. Molugwa  usab ang Sparkle artists nga sila Charlie Fleming, Prince Carlos, ug  Anthony Constantino.

Ang maong serye kay gimugna sa  GMA Entertainment Group ubos sa pagdumala ni Cheryl Ching-Sy, kauban ang creative team nga gipangulohan ni Creative Director Aloy Adlawan ug ubos sa direksyon ni  Dominic Zapata. Makita ang  “The Master Cutter” matag Lunes hangtod Biyernes, alas 8:15 sa gabii sugod karong  Mayo 11 sa GMA Prime, ug online pinaagi sa Kapuso Stream ug GMA Play. Alang sa mga Pilipino sa gawas sa nasud, makita usab kini pinaagi sa GMA Pinoy TV.

Maki mitangag  og 1 billion all-time streams sa Spotify

Puwerting lipaya sa  OPM singer nga si  Maki sa bag-ong kasikas sa iyang career human nilangkat na siya og kapin  sa   1 billion all-time streams sa Spotify.

Human sa kalamposan sa iyang  "Kolorcoaster: One More Ride" concert sa  Araneta Coliseum, naghinam-hinam na si Maki sa iyang  international tour, kun diin malakip niini ang Singapore , Indonesia, North America, Australia, ug  New Zealand.

Ang iyang "Kolorcoaster" album kay gilangkoban sa mga awit nga "Dilaw," "Namumula," "Bughaw," "Kahel na Langit," "Turning Green," "INDIGO (with u)," "Nangungulila," "Itim na Ulap," "Abelyana," ug "ROYGBIV."