Nasobraan ka-clingy

Dear Tito Miguel,

Maayong adlaw, tawga lang ko og Matthew, 27 anyos ug taga Barangay Capitol Site, Cebu City. Naa koy uyab, siya si Alexa, mag-usa na mi ka tuig. Buotan man siya ug sweet kaayo. Guwapa kaayo si Alexa maong daghan nag-ingon nga suwerte kay ko nga pagkatawo. Apan Tito Miguel, usahay murag sobra na iyang pagka-clingy ug pagka-childish. Ganahan siya nga pirmi mi mag-video call, bisan naa ko sa trabaho. Kung dili ko ka-reply dayon, masuko siya ug moingon nga wala na daw ko’y oras kaniya . Usahay mag-selos siya bisan sa akong mga barkada o bisan sa akong mga soud nga higala nga babaye. Kung dili masunod iyang gusto, mangloud, dayon murag bata. Gisultihan na nako siya nga kinahanglan pud ko og personal space ug oras para sa akong trabaho ug pamilya ug friends .Apan mohilak siya og maayo, unya ako na pud ang ma-guilty. Nahigugma ko niya, apan kapoy pud sige’g explain nga dili pasabot nga dili ko permi available, dili na nako siya love. Tito Miguel, Unsaon nako pagpasabot niya nga kinahanglan og balanse ang relasyon? Normal ra ba ni nga ingon-ani siya kay love lang gyud ko niya, o kinahanglan na ba ko maghimo og klarong boundaries? Dili ko gusto makasakit niya, pero gusto pud ko og relasyon nga naay pagsinabtanay ug maturity. — Matthew

* * *

Matthew,

Ikaw ra iyang kalibotan. Delikado, hikawan ka sa imong pagkatawo mismo. Dili siya mosabot nga gawas nga uyab ka niya, anak sab ka sa imong mga ginikanan, igsoon sa imong manghod o maguwang kun duna man, ug higala sa uban.

Gusto niya usa ra imong pagkatawo, nga uyab ka niya, wa na’y labot ang uban. Okay ra na kun ikaw patagad, o mora sab ka’g gibayaw kun gipanag-iya ka. Apan ka’y nireklamo man ka, buot pasabot nilapas na siya sa utlanan. Pasabta nga duna’y oras ug lugar para sa tanan. Ingna mas maayo pasagdan ka niya samtang nagtrabaho o kuyog ang uban nga tawo, aron duna mo’y hinangpon ug istoryahan ini’g kita ninyo. Basta kahibawo siya asa ka, kinsa’y kuyog ug nag-unsa, dili na ka mistil panid-an kada minuto. Ka’y kun mora siya’g CCTV nga nag-monitor kanimo, unsa pa man imong ibalita kaniya nga kahibawo na man siya daan sa tanan? Kun dili mosugot, ayaw na pasabta, wa’y kapuslanan. T

oxic imong uyab. Dili maminaw’g rason, dili mopili’g lugar. Laliman ka hasta sa trabaho maki’g video call nimo. Sobra ra, wala na sa insakto’ng kabuot. Maski unsaon nimo’g pasabot, dili na makasabot. Kun makasabot man, dili mag-usab. Kun mag-usab man, mobalik ra gihapon sa iyang naandan. Busa kani ang buhata, ikaw ra’y magbuot kanus-a ka mohatag niya’g panahon. Kun masuko o mangluod, pasagdi. Kun kada pangluod imong am-aman, ikaw na ang kontrolado. Kun mohilak, ayaw’g padala. Timan-i, ang luha momaneho ug momanipula kanimo. — Tito Miguel

Magpatambag ka? Ipada kang Tito Miguel: 0991-318-9366