Gioperahan sa tuhod

CEBU, Philippines — Nipaubos og  medical treatment  ang singer-actress nga si  Karylle. Gi-operahan kini sa tuhod.   "Getting back into the swing of things," Instagram post ni Karylle .

Nationwide ug world tour 

Tungod sa kasikat sa SexBomb Girls  , gikatahong makabaton ang maong grupo og  nationwide ug international tour. Gikatahong  gisugdan na og plano ang maong butang . Kahinumdoman nga puros nagmalampuson ang ilang reunion concert didto sa kaulohan.

Bea napungot sa online limos

Gisamokan si Bea Borres sa mga nangayo og kuwarta kaniya  online.  Nisamot ang iyang kalagot gumikan kay kasagaran sa nangayo kaniya og kuwarta kay nagtingoha nga mopalit og bag-ong cellphone . Samtang ang uban nangayo og kuwarta kay napildi sa sugal . "It’s 2026 uso parin online limos???," ni Bea. —Sanden J. Anadia

Chariz, Buboy, ug Dasuri wala gihapon kadawat og TF

Dul-an na sa  duha ka tuig human nahunong sa ere ang noontime show nga Tahanang Pinakamasaya niadtong Marso 2, 2024, wala pa gihapon madawat nila Chariz Solomon,  Buboy Villa ug Dasuri Choi ang ilang talent fee alang  maong show  nga gipaluyohan sa  TAPE Inc.

Ang maong  dakong rebelasyon  kay nahisgotan  ni Chariz sa bag-ong  episode sa Your Honor, ang podcast nila ni

Buboy sa YouLOL sa GMA Network, diin ilang giingon nga hangtod karon wala pa'y aksyon ang TAPE Inc sa ilang pagpaningil.

"Di ba, magkasama tayo sa Tahanang Pinakamasaya noon? Hindi ba, hindi pa tayo bayad. Huy, 2026 na TAPE! Baka naman!” suma pa ni Chariz.. 

Kyjuan Virtucio molugwa sa international stage

Molarga na karong adlawa paingon sa Thailand ang Sugbuanon nga modelo nga si Kyjuan Virtucio alang sa pagsikad sa mga kalihokan sa 4th Edition sa I Am Model Search International.

Si Kyjuan ang pambato sa Pilipinas sa maong kompetisyon nga modagan hangtod sa Enero 18, 2026 didto sa Korat, Thailand , ug gisalmotan niya ang Adults Category, diin makatigi niya ang nagkadaiyang modelo gikan sa lain-laing nasod .

Siya ang kasamtangang naghupot sa titulo nga  Mister Friendship Ambassador Philippines.

Proud talent si Kyjuan sa GPA Model Cebu gidumala ni Gianne Paolo Anciano.

Uban sa dakong suporta sa Filipino community, ihatag gyud niya ang tibouk nga paningkamot aron mamintinar sa Pilipinas ang pagka-kabanggiitan niini sa bisan unsa nga kompetisyon.

Onemig ug Aiko malipayon sa usa’g-usa

Nitumaw karon ang mga pagduda nga duna na’y nahulma nga espesyal nga relasyon sila Onemig Bondoc ug Aiko Melendez.

Wala gitino sa duha ang partikular  nila nga status  apan gitataw nila nga malipayon sila sa usa’g-usa. Kahinumdoman nga sa nilabay  nga 29 ka tuig,  nanguyab na si Onemig kang Aiko  apan wala gyud kini sugta niadtong tungora.

SB19 ug TJ nagmadaogon sa 11th Wish Music Awards

Nagmadaogon ang grupo nga SB19 ug ang  singer-songwriter  nga si TJ Monterde sa  11th Wish Music Awards (WMAs) niadtong Dominggo didto sa Araneta Coliseum.

Nakuha sa SB19 ang mga pasidungog nga  Wishclusive Pop Performance of the Year (“DAM”), Wishclusive Ballad Performance of the Year (“Time”), Wish Pop Song of the Year (“DUNGKA!”), ug ang  Wishers’ Choice Award.

Nakuha usab niini ang  Wish Song Collaboration of the Year kauban si  Sarah Geronimo alang sa  “Umaaligid.”

Si TJ  usab ang nilangkat sa  Wish Artist of the Year, Wishclusive Collaboration of the Year kauban si James Reid alang sa “Pahinga,” ug Wish Ballad Song of the Year alang sa  “Darating Din.”  Nakuha usab niya ang KDR Icon of Breaking Boundaries award.

Ang banda nga  Cup of Joe kay  napili nga  Wishclusive Rock/Alternative Performance of the Year, Wish Rock/Alternative Song of the Year ( “Multo” )ug  Wish Group of the Year. 

Gidalitan usab ang APO Hiking Society og  KDR Icon of Musical Excellence.

Ang ubang mananaog  kay sila Eddie ug Jay R (R&B Performance of the Year; Statue), Paul N' Ballin (Hip-Hop Performance of the Year; “POGI”), Amiel Sol (Wishclusive Contemporary Folk Performance of the Year/ “Sa Bawat Sandali”),Janine (Wishclusive Contemporary R&B/Neo-Soul Performance of the Year; “Hulaan”),  Dionela (Wish R&B Song of the Year; “Marilag” ),  Robledo Timido ( Song of the Year;: Gusto Ko Sakin Ka Lang” ). Ben&Ben (Wish Contemporary Folk Song of the Year/: “Saranggola” ) ug Earl Agustin (Wish Contemporary R&B/Neo-Soul Song of the Year ; “Tayong Dalawa” ug Wish Breakthrough Artist of the Year ). Naangkon usab sa Organisasyon ng Pilipinong Mang-aawit ang pasidungog nga KDR Icon of Music and Philanthropy.