Viva migama og  Pinoy version sa "Sunny"

CEBU, Philippines — Ipasalida  na sa mga sinehan sugod   karong Abril 10  ang Pinoy version sa Korean hit movie nga "Sunny".

Ang Viva Films maoy nagpaluyo sa maong version ug gibitoonan kini nila ni Vina Morales, Angelu De Leon, Candy Pangilinan, Sunshine Dizon, Tanya Garcia, Katya Santos, Ana Roces, Heaven Peralejo, Bea Binene, Aubrey Caraan, Abby Bautista, Ashtine Olviga, Ashley Diaz, Heart Ryan, Marco Gallo, ug Xia Vigor.

Gipakita na sa niaging adlaw ang opisyal nga trailer sa "Sunny" nga ubos sa direksyon ni  Jalz Zarate.  

TP hosts magkita gihapon

Gibutyag ni Paolo Contis nga padayon gihapon  ang komunikasyon  nila sa mga hosts sa  Tahanang Pinakamasaya  bisan pa man nga nagtak-op na ang maong programa.

Ang ubang hosts niini kay naglangkob nila ni Isko Moreno, Betong Sumaya, Buboy Villar, Glaiza de Castro, Cassy Legaspi, Mavy Legaspi, Chariz Solomon, Winwyn Marquez, Dasuri Choi, Kokoy de Santos, Kimpoy Feliciano, Yasser Marta, Michael Sager, Alexa Miro, ug Arra San Agustin.  Magkita gihapon sila sa pipila ka mga okasyon.

Rayver mibarog sa iyang paghigugma kang Julie Anne

Gibarogan  ni Rayver Cruz ang tinud-anay niya nga paghigugma ngadto sa singer nga si  Julie Anne San Jose bisan paman sa mga isyu nga gibato kanila.

Matud pa niya nga dili malilong ang dako niya nga gugma ngadto kang Julie Anne. Kahinumdoman nga gisaway og maayo si Rayver gumikan kay  matud pa sipat kaayo siya atol sa  livestreaming  ni Julie Anne.

Dunay pipila ka netizens ang niakusar kaniya nga matud pa nakainom.

Hugtanon hinoun nga gihimakak ni Rayver ang maong akusasyon.

"Playful and happy talaga ako. Lalo na when I'm with my love. She knows that, she knows me," Instagram post sa aktor.

 Matud pa ni Rayver nga dako siya og respeto  ngadto sa iyang uyab .

"I respect Julie sobra sobra and sobra ko syang mahal pati ang family nya. Pangalawa, may respeto ako sa trabaho ko at sa mga katrabaho ko. Hinding hindi ako gagawa ng makakasira dun, " dugang pa ni Rayver. 

Heart mo-arte og balik

Giangkon ni  Heart Evangelista nga gimingaw na siya nga moarte atubangan sa kamera . Gikatahong dunay upcoming acting project ang aktres sa iyang mother network nga GMA. Masaligon si Heart nga hatagan siya og proyekto sa GMA nga haom gyud kaniya.

Gihangop sa listeners

Mapasigarbohong gibutyag sa Star Music  nga gipistahan sa Spotify ang mga awit sa grupong BINI . Nakabaton kini og 1.4 million nga monthly listeners."We are so grateful and so blessed thank you so much for all your support and manifestations for BINI To more blessings and achievements! PPOP Rise," social media post sa usa  sa mga miyembro niini nga si  Mikha.

It's Showtime makita na sa GMA-7?

Niulbo karon ang hungihong nga ang Kapamilya noontime show nga  “It’s Showtime” maoy ipuili sa  time slot sa nanamilit nga  “Tahanang Pinakamasaya.” Gikatahong gisugdan na ang negosasyon niini  .  Sa pagka-karon, padayon gihapon nga makita ang It's Showtime sa sister station sa GMA nga GTV.

Zayn dunay bag-ong awit

Gi-release na ni Zayn Malik ang bag-o niya nga awit nga "What I Am"  ug malipayon usab niya nga gianunsyo ang petsa alang sa paglusad sa iyang umaabot nga album.

"This song is the first release of a special project we been working on for years.Thank you for all the love and support on ‘What I Am’... Wouldn’t be able to do any of this without you," suma pa sa singer . Ang bag-o niya nga awit maoy usa sa mga bida sa iyang umaabot nga album  nga "Room Under The Stairs"

Ilusad ang iyang ikaupat nga album karong Mayo 15.

Produkto si Zayn sa “The X Factor UK” niadtong 2010 kun diin nahimo siya nga miyembro sa One Direction.Mao kini ang nagpasikat sa hit songs nga “What Makes You Beautiful,” "Kiss You", ug  "You and I.”

Nibiya siya  sa grupo niadtong 2015  aron mag-solo .