SportsYu U21 men's beach volley championships mosikad na sa Naga

CEBU, Philippines —  Ag labing unang SportsYu U21 Men's Beach Volleyball National Championships 2023 mosikad na karong adlawa didto sa Oceanside Village sa South Poblacion, dakbayan sa Naga habagatang bahin sa Sugbo.

Miabot ngadto sa 18 teams gikan sa nagkadaiyang dapit sa nasud ang magbugno alang sa makasaysayanong titulo.

Gipangulohan sa CONVA ug Naga Atong Garbo sa host city, ang ubang pambato sa Sugbo sa duha ka adlaw nga torneyo mao ang Team Joyful sa Toledo City, Yummy Mango sa Sibonga, University of Southern Philippines Foundation (USPF) ug Sugbro sa Cebu City, Team POAS, Team VNJ Sports sa Minganilla, ug Team Talisay City.

Nagkumpleto sa listahan sa mga entrante mao ang Teams 1 ug 2 sa San Juan,Team VNS ug Team Adela Purificacion sa Quezon City, Team Sentro Pilates sa Makati City, Teams 1 ug 2 sa National University (NU), University of St. La Salle (USLS) 2 sa Bacolod City, ug Team Bayawan City.

Sa laing bahin, ang siyudad sa Naga gibati og tumang kahinam nga mo-host sa prestihiyosong kalihukan nga gipaluyohan sab sa Mr. Potato ug Mr. Taho ubos sa M. Lhuillier Group of Companies.

Si mayor Val Chiong determinado nga palig-onon ang ilang programa sa paugnat sa kusog ug ang pagpasiugda ug national ug hasta gani international nga mga kompetisyon kabahin sa gitinguha sa ilang dakbayan. Ang beach volleyball ilang gilantaw nga usa ka mahinungdanong sport pagkab-ot sa ilang tumong.