Panamilit sa bakasyon
CEBU, Philippines — Medyo taas-taas pud ang bakasyon sa mga tawo karong panahona. Hapit na usab nato sugaton ang bag-ong tuig.
Pagka-sunod adlaw niana, balik napud sa normal ug pipila kanato ang nabitin sa bakasyon. Angayan ra man ikondisyon ang huna-huna sa pagpanamilit sa bakasyon.
Duna ra’y buhaton aron ma-relax ang imong kaugalingon ug dili ka tanto nga makalitan sa imong pagbalik sa eskwelahan o trabaho.
Namantala sa www.startsatsixty.com ang simple nga mga butang nga imong buhaton aron magpabiling gaan ang imong pamati human sa taas nga bakasyon.
• Kung makabaton og igong oras, suwayi ang pagtan-aw og salida sa sinehan. Pilia ang pelikula nga makahatag nimo og pahiyom . Basa na lang og mga movie review sa dili pa ka moadto og sinehan aron makakuha ka og ideya sa gusto nimong tan-awon. Nagbabag karong panahona sa mga sinehan ang mga pelikula sa Metro Manila Film Festival 2018. Kung fan mo ni Anne Curtis, tan-aw mo og Aurora. Kung feel nimo si Jessy Mendiola, suwayi ang ‘The Girl in the Orange Dress’. Apan kung fan ka ni Vice Ganda, tan-aw og Fantastica.
• Nindot usab sa pamati ang pagpa-massage. O ba kaha moadto og mga salon, aron magpatupi, magpa-facial aron presko ang imong panagway human sa taas nga bakasyon.
• Ayaw lang sa palabi og check sa imong mga social media accounts aron seguradong relax ang imong huna-huna.
• Laag sa duol nga mga resort. Mahimo ra usab mag-picnic mo sa mga lugar nga dili samok.
• Kung hasolan na ka mogawas sa balay, basa og libro o bisan unsa nga reading materials. Samtang nagbasa ka, naa pud sa kilid ang paborito nimo nga pagkaon .
• Paminaw sa imong favorite songs.
Banat IN mga palihi nagpabilin
Nagpanikad na usab ang katawhan alang sa pagsugat sa Bag-ong Tuig ug pipila kanato ang padayon nga nagtamod sa mga palihi.
Ang uban wala nanumbaling sa mga patuo-tuo, apan duna gihapo’y mga tawo ang nituman sa mga palihi gumikan kay alang kanila, ” wala’y mawala kanimo kung mutuo ka.”
Nagsagol ang matang sa palihi sa pagsugat sa Bag-ong Tuig ug usa na niini ang pagtigom og 12 ka lingin nga mga prutas gumikan kay mosulod gyud matud pa ang suwerte sa imong kinabuhi.
Samtang ang laing palihi sa pagsugat sa Bag-ong Tuig mao ang pagsul-ob og sapot nga adunay desinyo nga lingin o polka dots aron duna matud pa’y daghang kuwarta nga moabot kanimo.
Dili pud magpalupig ang uban, naandan na usab sa pipila ka mga tawo ang pagpangabli sa tanang pultahan ug bintana alang sa pagpasulod sa suwerte sa ilang panimalay.
Dugang pagpalihi mao ang pagpundo og mga sinsilyo ug uyogon kini inigtungang gabii ug giingong moabot kanimo ang dugang mga kuwarta.
Pipila usab kanato ang magsaba-saba aron mupalayo ang mga dautang espirito. Sama na lang sa pagdukdok sa takob sa kaldero o lata.
Samtang ang parish priest sa St. Ignatius of Loyola Parish diha sa Kawit Medellin nga si Father Lyndon Ruiz nipadayag nga ang pagtuo sa Ginoo maoy tinud-anay nga pampasuwerte.
Sa pagsugat sa bag-ong tuig, sugdan kini pinaagi sa pagpasalamat sa labaw nga makakagahum.
- Latest