Eskina Kusina: Banoffee Pie

CEBU, Philippines - Sa matag higayon nga kita mobisita og mga dessert shop, kanunay gyud kita maglaway sa mga lamian nila nga paninda gumikan sa maka-impress nga mga presentasyon niini.

Inig basa pa lang nato sa mga pangalan ug pagtan-aw sa hitsura  niini, makaingon gyud kita nga lahi ug dili gyud masayun-sayun ang pagama niini.

Apan kun abtik lang gyud kita nga mangita sa mga sagul niini sa internet, makaingon kita nga sayon ra man diay. Gani, makahimo usab kita og sama sa ilang paninda.

Karong adlawa, atong saw-an ang pagkat-on sa paghimo og Bannofee Pine, ug suma pa sa www.carnation.co.uk,usa kini sa mga bag-o nga lamian nga dessert nga dali lamang nga mahimo. Matud pa sa eksperto nga ang ngalan niini nagikan sa Banana ug Toffee. Kun sa atong pinulungan, saging ug yemas ra kini nga gisagol.

Kining klase sa pagkaon mobalor lamang sa P100 nimo nga budget. Sigurado nga malingaw gyud kita kun mismo  kita ra usab ang momaneho sa pagama niini. Gawas nga makat-on kita, magtagbaw usab kita kay makabana-bana ra man ta kun pila ang  gidaghanun sa atong himuon.

Mga sagol:

•2 ka tasa sa dinugmok nga Grahams

•1 ka pakite sa bugnaw nga all-purpose cream

• ½ sa pakite sa kondensada

• ¼ tasa sa butter

• 2 ka saging

Proseso:

1.Ibutang ang dinugmok nga Grahams sa dako nga panaksan nga dili kaayo lawom.

2.Sa kaha, palanayon usab ang butter.(Kinahanglan dili kaayo kusog ang kalayo sa pagpalanay sa butter)

3.Isagol ang nalanay nga butter sa dinugmok nga Grahams nga anaa sa panaksan. Kinahanglan nga mahulma kini aron mamahimong basehan sa imong pie.

4.Sunod nga himuon mao ang pagbutang sa ¼ nga kondensada sa kaha aron maghimo og toffee o yema. Pagahion lang ang kondensada nga sakto lang gihapon ang pagkalapot. (Kinahanglan nga dili pakusgan ang kalayu aron dili mahimong brown ang kolor.)

5.Hiwaon na ang mga saging sa gagmay’ng bahin.

6.Ibutang ang hiniwa nga saging ibabaw sa base sa imong pie.

7.Ibubu ug ipakatag ang yema sa ibabaw sa saging.

8.Ibutang ang bugnaw nga all-purpose cream sa laing panaksan ug batilun og dugay aron mobaga ang tekstura niini.

9.Hinay-hinayon pagbutang ang nahibiling ¼ nga pakite sa kondensada sa gibatil nga all-purpose cream. Batilon pag-usab.

10.Ibutang ang cream sa ibabaw sa saging. Ipahimutang kini pagbutang hangtod sa mopatag na kini.

11.Ang mga nahibilin nga dinugmok nga grahams, ibubu kini sa ibabaw sa cream.

12.Kun aduna usa’y nahibilin nga cream, mamahimo nga himuon kining dekorasyon sa pie.

13.Human sa paggama sa maong pie, ibutang sa refrigerator ug pabugnawon ug aron usab nga mogahi kini.

14.Human sa pipila ka oras, mamahimo na kini nga i-apud-apud . (BANAT NEWS)