Churva giidolo sauna pa

CEBU, Philippines – Gibutyag ni Liza Soberano nga sa dihang dili pa siya artista, giidolo na niya daan si Gerald Anderson busa dako niya nga garbo nga makauban niya kini sa pelikulang Everyday I Love You. Si Gerald maoy makatigi ni Enrique Gil sa maong pelikula.

Resulta sa paningkamot

Mapasigarbohong gipadayag ni Ejay Falcon nga hapit na mogradwar sa kolehiyo ang duha niya ka mga igsuon. Ang aktor maoy nagasto sa pagpatungha niini busa nalipay siya gumikan kay duna gyu’y resulta ang iyang hinagoan sa showbiz. “Nakaka-proud, ang sarap ng feeling na makakatapos na ang mga kapatid ko. Parang ‘yun talaga ang premyo sa lahat ng paghihirap mo,” suma pa sa aktor.

Kris gitambagan sa mga higala

Gitambagan si Kris Aquino sa iyang mga higala nga minosan ang pagpatol sa iyang bashers sa social media aron dili siya ma-stress. Kahinumduman nga dili gyud lung-an sa TV host ang netizens nga magsige og pangatake kaniya.

Vhong mipasalig

Gipasalig ni Vhong Navarro sa katawhan nga kataw-anan gyud ang umaabot niya nga pelikula nga  Buy Now Die Later. Usa kini sa mga pambato sa umaabot nga Metro Manila Film Festival (MMFF) ug makauban niya niini sila si Billy Crawford, Alex Gonzaga, John Lapus, Lotlot de Leon, ug  Rayver Cruz.

Ella ug AJ magpares

Sila si Ella Cruz ug AJ Muhlach maoy magpares sa ‘Wattpad Presents: Bebeng Pabebe Meets Super Jiro’. Padayon ang paglugwa ni Ella sa TV5 gumikan kay wala pa siya’y proyekto sa ABS-CBN.

Elha andam moarte

Tsika pa sa champion sa The Voice Kids Season 2 nga si Elha Nympha nga bukas siya sa posibilidad  nga mosulod puhon sa acting world. Apan niining higayona, hatagan una  niya og prayoridad ang pagkanta.

Nagbalik

Nagbalik sila si Arnell Ignacio ug ang iyang  boyfriend nga si  Ken Psalmer human nagbuwag  sa miaging buwan.  Suma pa ni Arnell ang usa niya ka higala maoy rason sa ilang panag-away kaniadto ug nagpataka kini og  hatod og mga istorya. Nasuta kini ni Arnell  busa nag-istoryhanay sila og tarong ni Ken.

Alang sa mga anak

Nagsagunson na ang panagkita nila ni Claudine Barretto ug  Raymart Santiago kung diin kauban nila ang ilang mga anak.  Gusto sa duha nga magmalipayon ang ilang mga anak busa ilahang gipadaplin ang ilang panagbangi bisan pa man nga wala na sila’y relasyon.

Nagpa-relax sa Germany

Mibakasyon sa Germany ang magtiayong Robin Padilla ug Mariel Rodriguez. Gusto ni Mariel nga ma-relax human sa paet niya nga mga kaagi. Kahinumduman nga kaduha na nga higayon nga napunitan ang iyang gisabak.

Clyde misidlak

Nakadawat og init nga paghangop gikan sa viewers ang performance sa child star nga si Clyde Avery Bagasbas sa seryeng  Doble Kara sa ABS-CBN. Kahinumduman nga nilugwa usab kaniadto si Clyde sa seryeng On The Wings of Love kung diin midala siya isip batang Nadine Lustre.