Carmina ug Janice pambato sa buntag

CEBU, Philippines - Human natsugi ang programang Buzz ng Bayan,giingong mugnaan sila si Janice de Belen ug Carmina Villaroel og morning talk show sa ABS-CBN.

Giingong ang maong programa maoy iatbang sa show nila ni Alessandra de Rossi, Gladys Reyes ,Chef Boy Logro ug Donita Rose nga "Every Day Happy" sa GMA-7.

Samtang dili na bag-o ang tandem nila ni Carmina ug Janice sa usa ka talk show gumikan kay nagkauban na sila niadto sa programang "SIS" sa GMA-7.  ()

Jamich engaged na!

 Engaged na ang YouTube sensation ug real life couple nga Jamich o Jam Sebastian ug Paolinne Michelle "Mitch" Liggayu sa tinuod nga kinabuhi.

   Suma pa ni Mitch nga siya gyud ang ni-propose ngadto kang Jam, dili sama sa naandan nga ang lalaki gyud ang mo-propose ngadto sa babaye.

   Naghambin karon sa sakit nga lung cancer si Jam apan giklaro ni Mitch dili kini maoy rason nganong gihagad niya iyang hinigugma og kasal.

  Matud pa niya nga sa miaging tuig pa niya giplano ang iyang proposal ug gitataw usab niya nga dili siya mabdos.

  Nagkanayon si Mitch nga panahon na nga magminyo silang duha gumikan kay napamatud-an na nilang duha ang hugot nila nga paghigugmaay sulod na sa unom ka tuig. 

Gusto ni Mitch ang beach wedding ug sa Paris ang ilang honeymoon. Wala pa'y tukmang petsa sa ilang kasal gumikan kay gipaabot pa nga maayo si Jam sa iyang sakit.

Sorpresa ni Direk Lino

Gisorpresa ni Direk Lino Cayetano ang iyang followers sa Instagram human niya gi-post ang hulagway sa  anak nila ni kanhi Ateneo volleyball star  Fille Cainglet nga nanganak niadtong Martes.

Giingong naghilom-hilom lang diay si Direk Lino sa pagsabak sa iyang asawa (namantala dinhi sa Banat News Hugyaw kagahapon).

Nakugang ang iyang followers gumikan kay igo ra miingon si Direk Lino sa miaging adlaw nga excited na siya nga makabaton og anak ug malipayon siya nga nagsabak ang iyang asawa, apan niadtong tungora, nanganak na  diay si Fille.

Nasayud Ba kamo?

Ni-arangkada og maayo ang kaanyag sa mga taga Poro, Camotes karong tuiga. Kini gumikan kay duha ka mga beauty queens nga nakoronahan niining bag-o lamang, taga Poro og kagikan.

Sila mao si: Arielle Dianne Garciano isip Miss World New Zealand.

Kris Janson isip Bb. Pilipinas Intercontinental.

Ang ilang mga amahan, managsama nga lumad sa maong lungsod. (BANAT NEWS)